హైదరాబాద్ మెట్రో దశ-2కు ₹275 కోట్ల నిధులు విడుదల

హైదరాబాద్ మెట్రో రైలు రెండో దశ పనుల కోసం ప్రభుత్వం ₹275 కోట్ల నిధులు విడుదల చేసినట్టు HMR అధికారులు తెలిపారు. ఇందులో ₹125 కోట్లు కేంద్రం మంజూరు చేసిన నిధులు ఉన్నాయి.

ఈ ₹125 కోట్లను ఓల్డ్ సిటీలో జరుగుతున్న విస్తరణ పనులకు లేదా భూసేకరణకు వినియోగించే అవకాశం ఉంది. అలాగే విద్యుత్‌కు సంబంధించిన పనులు, మురుగునీటి కాలువల మార్పులు చేర్పులకూ ఈ నిధులు కేటాయించినట్టు అధికారులు చెప్పారు.

మిగిలిన ₹150 కోట్లను కూడా విడుదల చేశారు. ఈ నిధులు రెండో దశలోని ఓల్డ్ సిటీ కారిడార్, ఇతర కారిడార్ల పనులకు వెళ్తాయి. కారిడార్ల మధ్య విభజించి ఈ నిధులను వినియోగించుకోవాలని భావిస్తున్నట్టు HMR అధికారులు తెలిపారు.

ప్రస్తుతం మొదటి దశలో 69 కిలోమీటర్ల మేర మెట్రో రైలు విస్తరించింది. మూడు కారిడార్లలో మెట్రో సర్వీసులు కొనసాగుతున్నాయి. రెండో దశలో మరింత విస్తరించి ప్రజలకు మెరుగైన సౌకర్యాలు అందించాలని ప్రభుత్వం లక్ష్యంగా పెట్టుకుంది.