హైదరాబాద్ మెట్రో నిధులపై సీఎం రేవంత్ రెడ్డి నుంచి కేంద్ర మంత్రి కిషన్ రెడ్డికి లేఖ; బీజేపీ కౌంటర్ లేఖ

తెలంగాణ ముఖ్యమంత్రి రేవంత్ రెడ్డి, హైదరాబాద్ మెట్రో రైలు ప్రాజెక్టుకు సంబంధించి కేంద్ర మంత్రి కిషన్ రెడ్డికి బహిరంగ లేఖ రాశారు. మెట్రో ఐఆర్ఎఫ్సీ ఫైనాన్సింగ్, పెండింగ్ అంశాలపై చర్చించేందుకు జూన్ 22, 23 తేదీల్లో రైల్వే మంత్రితో సమావేశం ఏర్పాటు చేయాలని లేఖలో కోరారు.

గతంలో, రాష్ట్ర ప్రభుత్వం మెట్రోని స్వాధీనం చేసుకునేందుకు ఐఆర్ఎఫ్సీ ద్వారా అప్పు తీసుకురావడాన్ని కిషన్ రెడ్డి అడ్డుకున్నారని రేవంత్ రెడ్డి ఆరోపించారు. ఈ విషయంలో కిషన్ రెడ్డి స్పందించి, రాష్ట్రం కోసం కలిసి పనిచేయడానికి తాను సిద్ధమని ప్రకటించారు. ఈ నేపథ్యంలో రేవంత్ రెడ్డి ఈ లేఖ రాయడం జరిగింది.

కాగా, సీఎం రేవంత్ రెడ్డి లేఖకు కౌంటర్‌గా తెలంగాణ బీజేపీ అధ్యక్షులు రామచంద్రరావు స్పందించారు. కాంగ్రెస్ ఇచ్చిన హామీల వైఫల్యంపై నివేదిక ఇవ్వడానికి రాహుల్ గాంధీ అపాయింట్మెంట్ ఇప్పించాలని రామచంద్రరావు లేఖ ద్వారా డిమాండ్ చేశారు. మహిళలు, రైతులు, నిరుద్యోగులకు ఇచ్చిన కీలక హామీలు ఒక్కటి కూడా నెరవేరలేదని, ప్రభుత్వం ఘోరంగా విఫలమైందని ఆరోపించారు. ఈ సందర్భంగా రేవంత్ రెడ్డి కూడా రాహుల్‌తో భేటీకి రావచ్చని పేర్కొన్నారు.

మరోవైపు, కాంగ్రెస్ నేత మహేష్ కుమార్ గౌడ్ రామచంద్రరావుకు సవాలు విసిరారు. అభివృద్ధిపై చర్చకు బీజేపీ నేతలు సిద్ధమా అని ప్రశ్నించారు. ప్రధాని మోదీ అపాయింట్మెంట్ ఇస్తే, రెండు కోట్ల ఉద్యోగాలు, ప్రతి పేద కుటుంబానికి రూ.15 లక్షలు, పెట్రోల్-డీజిల్ ధరల తగ్గింపు వంటి బీజేపీ హామీలపై తాను ప్రశ్నిస్తానని అన్నారు.