హైదరాబాద్ ఓఆర్ఆర్‌పై పోలీసుల కాల్పులు: 100కు పైగా కేసుల నిందితుడికి గాయం

హైదరాబాద్ ఔటర్ రింగ్ రోడ్‌పై మంగళవారం అర్ధరాత్రి పోలీసులు జరిపిన కాల్పుల్లో భూషణి శ్రీకాంత్ అనే నిందితుడు గాయపడ్డాడు. నల్గొండ CCS పోలీసులు అతన్ని అదుపులోకి తీసుకోగా, ప్రస్తుతం వనస్థలిపురం ఆస్పత్రిలో చికిత్స పొందుతున్నాడు.

ఎగ్జిట్ నెంబర్ 12 వద్ద నల్గొండ CCS బృందం శ్రీకాంత్ ప్రయాణిస్తున్న DCM వాహనాన్ని అడ్డగించింది. అతను తప్పించుకునే ప్రయత్నంలో పోలీసులపై దాడికి దిగడంతో, హెచ్చరికల అనంతరం అతని కాళ్లపై కాల్పులు జరిపారు. ఈ ఘటనలో కానిస్టేబుల్ విష్ణువర్ధన్ గిరికి స్వల్ప గాయాలయ్యాయి.

ఆంధ్రప్రదేశ్, తెలంగాణ రాష్ట్రాల్లో దాదాపు 100కు పైగా చోరీ, దోపిడీ కేసుల్లో శ్రీకాంత్ నిందితుడిగా ఉన్నాడు. 2007లో గుంటూరు జిల్లా నర్సాపూర్‌లో కానిస్టేబుల్ హత్య కేసులో కూడా అతనిపై నిందారోపణలు ఉన్నాయి. గతంలో అతని ఆచూకీ కోసం పోలీసులు పోస్టర్లు విడుదల చేసి నగదు బహుమానం ప్రకటించారు.

ఇటీవల నల్గొండ జిల్లాలో జరిగిన ఒక చోరీలో లభించిన వేలిముద్రల ఆధారంగా శ్రీకాంత్‌ను గుర్తించిన పోలీసులు ప్రత్యేక బృందంతో నాలుగు రోజులుగా నిఘా వేసి పట్టుకున్నారు. అతని DCM వాహనంలో కత్తి లభించింది. DCM డ్రైవర్‌ను కూడా పోలీసులు అదుపులోకి తీసుకుని విచారిస్తున్నారు. ఘటనపై పూర్తి స్థాయి దర్యాప్తు కొనసాగుతోంది.