గరుడ పంచమి, నాగపంచమి పూజలు: ఆగస్టు 17న ఇలా చేయాలని పురాణాలు చెబుతున్నాయి

ఈ ఏడాది ఆగస్టు 13 గురువారం నుంచి శ్రావణ మాసం ప్రారంభం అవుతుంది. శ్రావణ మాసంలో వచ్చే శుక్ల పంచమిని నాగపంచమి, గరుడ పంచమిగా పిలుస్తారు. ఈసారి ఈ పర్వదినం ఆగస్టు 17 సోమవారం వస్తోంది.

భవిష్య పురాణం 36వ అధ్యాయం ప్రకారం, ఈ రోజు ఇంటి ప్రధాన ద్వారానికి రెండు వైపులా గోడలపై ఆవుపేడతో సర్పం బొమ్మలు గీయాలి. వాటికి సువాసన కలిగిన పుష్పాలు, గరికపోచలు, దర్భలు, గంధం, అక్షింతలు సమర్పించాలి. వీలు కుదిరితే ఆవుపేడతో రెండు సర్పాకారాలను చేసి పెరుగుతో అభిషేకం చేయవచ్చు.

ఆవుపేడ అందుబాటులో లేకపోతే తడి పసుపు లేదా తడి గంధంతో సర్పం బొమ్మలు గీయవచ్చు. పూజకు సమయం లేని వారు కేవలం హారతి ఇచ్చినా సరిపోతుందని పురాణం చెబుతోంది. ఈ విధానాన్ని శివుడు పార్వతికి చెప్పినట్టు భవిష్య పురాణం పేర్కొంటోంది.

గరుడ పంచమి రోజు శత్రుబాధలు, దృష్టి దోషాలు తొలగాలంటే గరుత్మంతుడి 12 నామాలను దీపం పెట్టిన తర్వాత పఠించాలని పురాణాలు చెబుతున్నాయి. ఆ నామాలు: సుపర్ణం, వైనతేయం, నాగారిం, నాగభీషణం, జితాంతకం, విశారిం, అజితం, విశ్వరూపిణం, గరుత్మంతం, ఖగశ్రేష్ఠం, తార్క్ష్యం, కాశ్యపనందనం.

ఇవే కాకుండా శివాభిషేకం చేయడం కూడా మంచిదని స్కాంద పురాణం, నారద పురాణం తెలుపుతున్నాయి. నాగపంచమి రోజు సర్పాలను, గరుత్మంతుడిని ఇద్దరినీ ఒకేసారి పూజించే సంప్రదాయం ఉంది. ఈ పూజా విధానాలను భవిష్య పురాణం, స్కాంద పురాణం, నారద పురాణం వివరించాయి.