వరంగల్‌లో నాగుల చవితి: ఆలయాల్లో భక్తుల రద్దీ, పుట్టల్లో పాలు

వరంగల్ జిల్లాలో కార్తీక మాసం నాగుల చవితి సందర్భంగా ఆలయాల్లో భక్తుల రద్దీ కనిపిస్తోంది. ఉదయం నుంచే భక్తులు పుట్టల వద్ద పాలు పోసి మొక్కులు చెల్లించుకుంటున్నారు. సుబ్రహ్మణ్య స్వామి ఆలయాల్లో ప్రత్యేక పూజలు జరుగుతున్నాయి.

వరంగల్ జిల్లాలోని ఊకల గ్రామంలో నాగేంద్ర స్వామి సమేత సుబ్రమణ్యేశ్వర స్వామి ఆలయం ఉంది. ఇక్కడ భక్తులు ఉదయం నుంచే దర్శనానికి వస్తున్నారు. ఆలయాన్ని ప్రత్యేకంగా అలంకరించారు. రోజంతా వేలాది మంది భక్తులు దర్శనం చేసుకుంటున్నారు.

కార్తీక శుద్ధ చవితి రోజు నాగేంద్రుడికి, సుబ్రహ్మణ్య స్వామికి పూజలు చేస్తే నాగదోషాలు, సర్పదోషాలు తొలగిపోతాయని భక్తుల నమ్మకం. దీపావళి తర్వాత ఐదో రోజు ఈ చవితి వస్తుంది. ఈ ఆలయంలో పూజలు చేస్తే వివాహం, సంతానం, ఆరోగ్యం సిద్ధిస్తాయని విశ్వాసం ఉంది.

పురాణ కథనం ప్రకారం, బ్రహ్మను కొట్టినందుకు వచ్చిన బ్రహ్మహత్య దోషం నుంచి విముక్తి కోసం సుబ్రహ్మణ్య స్వామి సర్పావతారం ఎత్తారు. అనంతరం వాల్మీక వాసుడై పుట్టలో దర్శనం ఇస్తున్నారని భక్తులు చెబుతారు. అందుకే పుట్టల్లో పాలు పోయడం, అభిషేకాలు చేయడం ఆనవాయితీగా వస్తోంది.

భక్తులు పుట్టలో వెండి కన్ను, బంగారు కన్ను సమర్పించి పాలు పోస్తున్నారు. నైవేద్యాలు కూడా సమర్పిస్తున్నారు. రైతులు ఈ రోజును పెద్ద పండుగగా భావిస్తారు. పొలంలో పని చేసేప్పుడు సర్పం హాని చేయకూడదని ప్రార్థిస్తారు.

కొందరు భక్తులు సుబ్రహ్మణ్య స్వామి మాల ధరించి కావడితో ఆలయానికి వచ్చారు. మాల విరమణ చేసి దర్శనం చేసుకున్నారు. పుట్టలో పాలు పోసి దేవుడి దర్శనం కోసం వచ్చామని, చాలా సంతోషంగా ఉందని ఓ భక్తురాలు తెలిపారు.