చమురు సంక్షోభంపై ప్రధాని మోదీ వ్యాఖ్యలకు ఐరాస వాతావరణ విభాగం మద్దతు

ప్రధాని నరేంద్ర మోదీ చేసిన క్లీన్ ఎనర్జీ వ్యాఖ్యలకు ఐక్యరాజ్యసమితి వాతావరణ విభాగం మద్దతు తెలిపింది. గత పదేళ్లలో పునరుత్పాదక ఇంధన రంగంలో భారత్ చేసిన పెట్టుబడుల వల్ల అంతర్జాతీయ చమురు సంక్షోభాన్ని ఎదుర్కొనే సామర్థ్యం పెరిగిందని మోదీ చెప్పారు. ఐక్యరాజ్యసమితి వాతావరణ మార్పుల విభాగం కార్యనిర్వాహక కార్యదర్శి సైమన్ స్టీల్ ఈ వ్యాఖ్యలను సమర్థించారు.

శిలాజ ఇంధనాలపై ఆధారపడటం తగ్గించుకోవడమే దీర్ఘకాలిక పరిష్కారమని సైమన్ స్టీల్ అన్నారు. చమురు ధరలు పెరిగితే దాని ప్రభావం పెట్రోల్, డీజిల్‌కే పరిమితం కాదు. రవాణా ఖర్చులు, నిత్యవసర వస్తువుల ధరలు, పరిశ్రమల ఉత్పత్తి వ్యయం పెరుగుతాయి. చివరకు ద్రవ్యోల్బణం రూపంలో సామాన్యుడిపై భారం పడుతుంది.

సూర్యరశ్మి నుంచి సౌర విద్యుత్, గాలి నుంచి పవన విద్యుత్, నీటి నుంచి జల విద్యుత్ ఉత్పత్తి చేసుకోవచ్చు. వీటికి చమురు, గ్యాస్ దిగుమతులపై ఆధారపడాల్సిన అవసరం ఉండదు. విద్యుత్ వాహనాల వినియోగం పెరిగితే చమురు వినియోగం తగ్గుతుంది. దీంతో అంతర్జాతీయ చమురు ధరల ప్రభావం దేశ ఆర్థిక వ్యవస్థపై కొంతమేర తగ్గుతుంది. విద్యుత్ గ్రిడ్ వ్యవస్థల బలోపేతం, బ్యాటరీ నిల్వ సామర్థ్యం పెంపు కోసం ప్రధాని మోదీ ప్రకటించిన గ్రీన్ ఎనర్జీ కారిడార్‌ను సైమన్ స్టీల్ ప్రశంసించారు. సౌర, పవన విద్యుత్ ఉత్పత్తి నిరంతరం ఒకేలా ఉండదు. సూర్యుడు లేని సమయంలో, గాలి తక్కువగా వీచినప్పుడు సరఫరాలో అంతరాయం రాకూడదంటే బ్యాటరీ నిల్వ అవసరం. ఉత్పత్తి చేసిన విద్యుత్‌ను ఒక ప్రాంతం నుంచి మరో ప్రాంతానికి పంపేందుకు బలమైన గ్రిడ్ కూడా అవసరం.

2035 నాటికి ప్రపంచవ్యాప్తంగా విద్యుత్ వినియోగాన్ని వేగవంతం చేయాలన్న లక్ష్యంతో తుర్కియే 35/35 ప్రతిపాదనను ముందుకు తెచ్చింది. ఇప్పుడు అందుబాటులో ఉన్న సాంకేతిక పరిజ్ఞానంతోనే ప్రపంచ ఇంధన అవసరాల్లో 75% వరకు విద్యుదీకరించవచ్చని స్టీల్ తెలిపారు.

హిందూకుష్ హిమాలయ ప్రాంతాలపై తీవ్ర ఒత్తిడి ఉన్నట్టు ఆయన హెచ్చరించారు. ఇటీవలి వరదలు పర్వత ప్రాంతాల పర్యావరణ వ్యవస్థలు ఎంత సున్నితంగా ఉన్నాయో గుర్తు చేస్తున్నాయని చెప్పారు. భూమి ఉష్ణోగ్రతలు పెరిగే కొద్దీ హిమాలయ ప్రాంతాల్లో ప్రకృతి విపత్తుల ప్రమాదం పెరుగుతుందని ఆందోళన వ్యక్తం చేశారు. 2035 నాటికి వాతావరణ అనుకూల నిధులను మూడు రెట్లు పెంచాలని సూచించారు. బాకు-బెలెం రోడ్ మ్యాప్ కింద ఏటా 1.3 ట్రిలియన్ డాలర్ల వాతావరణ నిధులు సమీకరించాలని పిలుపునిచ్చారు.