రేపటి నుంచి హైదరాబాద్‌తో సహా తెలంగాణలో భారీ వర్షాలకు అవకాశం: IMD

హైదరాబాద్‌లో ఈ ఉదయం పలు ప్రాంతాల్లో తేలికపాటి నుంచి మోస్తరు వర్షాలు కురిశాయి. IMD అధికారుల ప్రకారం, నైరుతి ఋతుపవనాలు ఇప్పటికే హైదరాబాద్ వరకు విస్తరించాయి. రేపటి నుంచి వరుసగా నాలుగైదు రోజులు రాష్ట్రంలో విస్తారంగా వర్షాలు కురిసే అవకాశం ఉంది.

ఉదయం బోడుప్పల్, మేడిపల్లి, ఫిర్జాదిగూడ తదితర ప్రాంతాల్లో ముసురు కురిసింది. ఉప్పల్, నారాపల్లి పరిసరాల్లో చిరుజల్లులు పడ్డాయి. జూబ్లీ హిల్స్, యూసఫ్‌గూడ, పంచాగుట్ట, బేగంపేట, మలక్‌పేట్, దిల్‌షుక్‌నగర్, కొంపల్లి, బోయినపల్లి వంటి ప్రాంతాల్లో వర్షం కురిసి వాతావరణం చల్లబడింది. కొన్ని చోట్ల రోడ్లపై వరద నీరు నిలిచి వాహనదారులు ఇబ్బంది పడ్డారు.

IMD హెచ్చరికలో రాష్ట్రంలో 40–50 కి.మీ వేగంతో ఈదురుగాలులు వీచే అవకాశం ఉందని, ప్రజలు అవసరమైతే తప్ప బయటకు రావద్దని సూచించింది. GHMC అధికారులు ముందస్తు చర్యలు చేపట్టారు. ద్రోణి ప్రభావంతో హైదరాబాద్‌లో అక్కడక్కడ భారీ వర్షాలు కూడా పడొచ్చని వెదర్ ఆఫీసర్లు తెలిపారు.

దక్షిణ తెలంగాణ జిల్లాల్లో మాన్సూన్ గాలులు వీస్తుండడంతో తేమ వాతావరణం కొనసాగుతుంది. ఎల్‌నీనో ప్రభావం వల్ల ఋతుపవనాలు నెమ్మదిగా కదులుతున్నాయని, 23వ తేదీ నాటికి రాష్ట్రమంతా నైరుతి విస్తరించే అవకాశం ఉందని అధికారులు చెప్పారు. జూలై-ఆగస్టులో వర్షపాతం కీలకం కాగా, రిజర్వాయర్లలో నీరు నిల్వ చేసుకోవాలని, నీటి వినియోగం తక్కువ ఉండే పంటలనే వేయాలని రైతులకు సూచించారు.