హైదరాబాద్ రియల్ ఎస్టేట్ మందగమనం: JLL నివేదికలో వెలుగు చూసిన వివరాలు

అంతర్జాతీయ రియల్ ఎస్టేట్ కన్సల్టెన్సీ JLL విడుదల చేసిన నివేదిక ప్రకారం, జాతీయంగా రియల్ ఎస్టేట్ రంగం వృద్ధి చెందుతున్నా హైదరాబాద్ మాత్రం మందగమనం ఎదుర్కొంటోంది. 2025 తొలి త్రైమాసికంలో దేశవ్యాప్తంగా 90,000 కొత్త గృహ ప్రాజెక్టులు ప్రారంభమయ్యాయి. గతేడాదితో పోలిస్తే ఇది 13% వృద్ధి.

బెంగళూరు, ముంబై, పూణే, ఢిల్లీలు టాప్‌లో ఉండగా, ఇండోర్, లక్నో, కోయంబత్తూర్ వంటి నగరాలు కూడా ముందంజలో నిలిచాయి. హైదరాబాద్ మాత్రం టాప్ 7 నగరాల్లో స్థానం సంపాదించలేదు.

ఇళ్ల ధరలు 8% పెరిగినా కొనుగోళ్లపై ప్రభావం చూపలేదు. ప్రీమియం గృహాల (కోటి రూపాయలకు మించిన) విక్రయాలు జాతీయంగా 45-65% పెరిగినా హైదరాబాద్‌లో పెట్టుబడిదారులు వెనకడుగు వేశారు. పశ్చిమ గచ్చిబౌలి, ఫైనాన్షియల్ డిస్ట్రిక్ట్, కోకాపేట ప్రాంతాల్లో ప్రీమియం ప్రాజెక్టుల లాంచింగ్ 70% తగ్గింది.

ఈ మందగమనానికి కారణాలపై రియల్ ఎస్టేట్ వర్గాలు ఆందోళన వ్యక్తం చేస్తున్నాయి. ప్రభుత్వ విధానాల్లో అస్పష్టత, అనుమతుల జాప్యం, హైడ్రా చర్యలు వంటివి పెట్టుబడిదారుల నమ్మకాన్ని దెబ్బతీశాయని కొందరు నిర్మాణ సంస్థలు పేర్కొంటున్నాయి. అనుబంధ రంగాలైన సిమెంట్, స్టీల్, పెయింట్ వ్యాపారాలపైనా ప్రభావం పడింది. ఈ విషయంపై రేవంత్ రెడ్డి ప్రభుత్వం ఇంకా అధికారిక స్పందన ఇవ్వలేదు.