సరూర్‌నగర్‌లో అండాల దందా: 18 మంది యువతులు పోలీసుల అదుపులో

హైదరాబాద్‌లోని సరూర్‌నగర్ ప్రాంతంలో అండాలు (ova) సేకరించి అమ్మే దందా బయటపడింది. ఈ కేసులో 18 మంది యువతులను పోలీసులు అదుపులోకి తీసుకుని ప్రశ్నిస్తున్నారు. దందాలో కీలక వ్యక్తిగా భావిస్తున్న దుర్గాప్రసాద్‌ను కూడా అదుపులోకి తీసుకున్నారు.

నిన్న బేగంపేటలో ఇదే తరహా కేసులో 10 మందిని అదుపులోకి తీసుకున్నారు. దాంతో రెండు రోజుల్లో మొత్తం 28 మంది యువతులు పోలీసుల అదుపులో ఉన్నారు. వీరందరినీ మల్కాజ్‌గిరి పోలీసులు విచారిస్తున్నారు.

హైదరాబాద్, చుట్టుపక్కల ప్రాంతాలకు చెందిన పేద యువతులను డబ్బు ఆశ చూపి ఈ దందాలోకి తీసుకొస్తున్నారు. కాలేజీ విద్యార్థినులను కూడా ఇందులోకి తీసుకొచ్చినట్టు సమాచారం. కౌన్సెలింగ్ పేరుతో వారిని హాస్టల్‌లో ఉంచి అండాలు సేకరించేవారని పోలీసులు తెలిపారు. ఆ అండాలను IVF కేంద్రాలకు, కొన్ని కార్పొరేట్ ఆసుపత్రులకు అమ్మినట్టు విచారణలో తెలిసింది.

దుర్గాప్రసాద్ హైదరాబాద్‌తో పాటు గుజరాత్, మహారాష్ట్రలోని IVF కేంద్రాలకూ అండాలను సరఫరా చేసినట్టు సమాచారం వెల్లడైంది. ఈ దందాలో మొత్తం ఎంతమంది ఉన్నారనేది పోలీసులు విచారిస్తున్నారు.

అదుపులో ఉన్న యువతులకు కౌన్సెలింగ్ ఇస్తున్నట్టు పోలీసులు తెలిపారు. దుర్గాప్రసాద్‌ను విచారిస్తున్నారు. కేసుపై మరింత విచారణ కొనసాగుతోంది.