ఖమ్మం: కేసీఆర్ టవర్స్‌లో పోలీసుల కార్డన్ సెర్చ్, 1,248 ఇళ్ల తనిఖీ

ఖమ్మం నగరంలోని కేసీఆర్ టవర్స్‌లో పోలీసులు కార్డన్ సెర్చ్ నిర్వహించారు. పోలీస్ కమిషనర్ సునీల్ దత్త ఆదేశాల మేరకు టౌన్ ASP రమణమూర్తి ఆధ్వర్యంలో ఈ తనిఖీలు జరిగాయి. 300 మందికి పైగా పోలీసులను మోహరించి ప్రతి బ్లాక్‌లో సోదాలు చేపట్టారు.

ఇళ్లలో నివసిస్తున్న వారి వివరాలతో పాటు వాహనాల పత్రాలను పరిశీలించారు. సరైన పత్రాలు లేని వాహనాలు, అనుమానిత వ్యక్తులను అదుపులోకి తీసుకున్నట్లు సమాచారం. 52 బ్లాక్‌ల్లో 1,248 ఇళ్లను తనిఖీ చేశారు.

పోలీసుల జాబితా ప్రకారం గంజాయి పెడ్లర్లు 3, వినియోగదారులు 12, ఆస్తి సంబంధ నేరాల నిందితులు 3, సస్పెక్ట్ షీట్లు 2 ఉన్నాయి. వాహన తనిఖీల్లో ట్రిపుల్ రైడింగ్, డబుల్ రైడింగ్, మైనర్ డ్రైవింగ్ వంటి నియమ ఉల్లంఘనలపై దృష్టి పెట్టారు. కొన్ని కేసుల్లో ఫైన్లు పడ్డాయి.

తనిఖీల్లో 62 మోటార్ సైకిల్స్, 5 ఆటోలను గుర్తించారు. ఒక వ్యక్తి వద్ద 50 గ్రాముల గంజాయి దొరికింది. ఇద్దరు మోటార్ సైకిల్ నేరస్థులు, రిసీవర్లను గుర్తించినట్లు సమాచారం. 105 మందికి ఫింగర్‌ప్రింట్ తనిఖీలు చేశారు. సోదాలు కొనసాగుతున్నాయి.