ఇందిరా గాంధీ వర్ధంతి: డిప్యూటీ సీఎం భట్టి, మంత్రి శ్రీహరి నివాళి

ఇందిరా గాంధీ వర్ధంతి సందర్భంగా డిప్యూటీ సీఎం మల్లు భట్టి విక్రమార్క, మంత్రి వాకిటి శ్రీహరి హైదరాబాద్‌లోని నెక్లెస్ రోడ్డులో ఉన్న ఇందిరా గాంధీ విగ్రహానికి పూలమాల వేసి నివాళి అర్పించారు.

బ్యాంకుల జాతీయకరణ ద్వారా పేద, బలహీన వర్గాలకు ఆర్థిక భరోసా కల్పించారని భట్టి విక్రమార్క అన్నారు. ఆమె నిర్ణయాల వల్ల దేశంలో హరిత విప్లవానికి, వ్యవసాయ రంగ అభివృద్ధికి మార్గం సుగమమైందని చెప్పారు. దేశ ప్రజాస్వామ్య వ్యవస్థలో అట్టడుగు వర్గాలకు ఆమె ఆత్మస్థైర్యం కల్పించారని పేర్కొన్నారు.

20 సూత్రాల ఆర్థిక కార్యక్రమం, భూసంస్కరణలు, బ్యాంకుల జాతీయకరణ, హరిత విప్లవ విధానం వంటి నిర్ణయాలతో ఆమె దేశానికి ఆర్థిక పునాదులు వేశారని ఆయన తెలిపారు. ఈ విధానాలతో సామాజికంగా అన్ని వర్గాలను ఆత్మవిశ్వాసంతో ముందుకు తీసుకొచ్చారని చెప్పారు.

ఇందిరా గాంధీ 1984 అక్టోబర్ 31న హత్యకు గురయ్యారు. ఆమె మరణం దేశానికి తీవ్ర నష్టమని భట్టి విక్రమార్క ఈ సందర్భంగా అన్నారు.