HCU విద్యార్థులకు గంజాయి సరఫరా: సెక్యూరిటీ గార్డు అరెస్టు

హైదరాబాద్ సెంట్రల్ యూనివర్సిటీ (HCU) విద్యార్థులకు గంజాయి సరఫరా చేస్తున్న సెక్యూరిటీ గార్డును పోలీసుల Eagle టీమ్ అరెస్టు చేసింది. గచ్చిబౌలిలో సెక్యూరిటీ గార్డుగా పని చేస్తున్న వికాస్ సింగ్ (30)ను అధికారులు అదుపులోకి తీసుకున్నారు.

యూనివర్సిటీ సౌత్ గేట్ సమీపంలో గంజాయి ప్యాకెట్లు విక్రయిస్తున్నట్టు సమాచారం అందడంతో అతన్ని అరెస్టు చేసినట్టు పోలీసులు తెలిపారు. అతని నుంచి 150 గ్రాముల గంజాయిని స్వాధీనం చేసుకున్నారు. 5 గ్రాముల ప్యాకెట్‌ను ₹500 నుంచి ₹1,000 వరకు విక్రయిస్తున్నట్టు గుర్తించారు.

అతని నుంచి 23 మంది కొనుగోలు చేసినట్టు విచారణలో తేలింది. వారిలో ఏడుగురు యూనివర్సిటీ విద్యార్థులే. మరో కేసులో యూనివర్సిటీ మాజీ విద్యార్థి విశ్వజీత్ కలితను కూడా అరెస్టు చేశారు. రెండు కేసులను కలిపితే యూనివర్సిటీకి చెందిన 24 మంది విద్యార్థుల పేర్లు వెలుగులోకి వచ్చినట్టు సమాచారం.

కొందరు విద్యార్థులకు నిర్వహించిన పరీక్షల్లో గంజాయి వినియోగానికి సంబంధించిన THC పాజిటివ్ వచ్చినట్టు తెలుస్తోంది. దీంతో Eagle టీమ్ దర్యాప్తును మరింత లోతుగా చేపట్టింది.

అస్సాంకు చెందిన ఒక వ్యక్తి నుంచి పెద్ద మొత్తంలో గంజాయి కొనుగోలు చేసినట్టు నిందితుడు విచారణలో చెప్పినట్టు సమాచారం. ఆ గంజాయిని చిన్న ప్యాకెట్లుగా చేసి విక్రయించినట్టు అధికారులు గుర్తించారు. విద్యార్థులతో పాటు ప్రైవేట్ ఉద్యోగులకు కూడా సరఫరా చేసినట్టు ప్రాథమిక విచారణలో తెలిసింది. గచ్చిబౌలి పోలీసులు NDPS చట్టం కింద కేసు నమోదు చేసి దర్యాప్తు కొనసాగిస్తున్నారు.