అయోధ్యలో వన్ డే టూర్ ప్యాకేజీ.. నవంబర్ 1 నుంచి 14 ప్రదేశాల పర్యటన

ఉత్తరప్రదేశ్ పర్యాటక శాఖ అయోధ్యలో వన్ డే గైడెడ్ టూర్ ప్యాకేజీని ప్రకటించింది. 'అయోధ్య డివైన్ హెరిటేజ్ ట్రైల్' పేరుతో ఈ ప్యాకేజీ నవంబర్ 1 నుంచి ప్రారంభం కానుంది.

ఈ పర్యటన ఆరు గంటలు ఉంటుంది. ఒక రోజులో రెండు బ్యాచ్‌లుగా ట్రిప్‌లు నిర్వహిస్తారు. మొదటి బ్యాచ్ ఉదయం 10 నుంచి సాయంత్రం 4 గంటల వరకు ఉంటుంది. రెండో బ్యాచ్ మధ్యాహ్నం 1 నుంచి సాయంత్రం 7 గంటల వరకు ఉంటుంది.

ఈ టూర్‌లో మొత్తం 14 ప్రదేశాలను చూపిస్తారు. ప్రముఖ దేవాలయాలు, ఘాట్లు, ఇతర ముఖ్య ప్రాంతాలు ఇందులో ఉన్నాయి. ఎంచుకున్న వాహనాన్ని బట్టి ఒక వ్యక్తికి ₹1,650 నుంచి ₹2,500 వరకు ఛార్జ్ చేస్తారు.

పర్యటన అయోధ్యలోని లతా మంగేష్కర్ చౌక్ వద్ద ప్రారంభమవుతుంది. మొదట పర్యాటకులను రామాయణ మ్యూజియంకు తీసుకెళ్తారు. ఇక్కడ రామాయణ పాత్రల మైనపు విగ్రహాలను చూడవచ్చు. ఆ తర్వాత సూర్యకుంద్, గిరిజాకుంద్, పంచముఖి మహాదేవాలయం, గుప్తార్ ఘాట్, జుంకి ఘాట్, లక్ష్మణ్ కిల్లా శేషావతార ఆలయం చూపిస్తారు. చివరగా మళ్లీ లతా మంగేష్కర్ చౌక్ వద్ద పర్యటన ముగుస్తుంది.

అయోధ్యలో జరిగే దీపోత్సవ్ సందర్భంగా ఈ ప్యాకేజీని ప్రారంభించినట్టు పర్యాటక శాఖ తెలిపింది. ప్యాకేజీ పూర్తి వివరాలు, టికెట్ బుకింగ్ కోసం www.uptourism.gov.in వెబ్‌సైట్‌ను సందర్శించాలి.