SIR ముగిసినా ఓటర్ల జాబితా శాశ్వతంగా స్తంభించదు: సుప్రీంకోర్టు

SIR ప్రక్రియ పూర్తయినంత మాత్రాన ఓటర్ల జాబితా శాశ్వతంగా స్తంభించిపోదని సుప్రీంకోర్టు స్పష్టం చేసింది. జాబితా నుంచి పేర్లు తొలగించినంత మాత్రాన ఆ వ్యక్తులు ఓటు హక్కును శాశ్వతంగా కోల్పోతారని కాదని ధర్మాసనం పేర్కొంది.

SIR పూర్తయిన తర్వాత కూడా అర్హులైన ఓటర్లు తమ పేర్లను జాబితాలో చేర్చుకోవడానికి దరఖాస్తు చేసుకోవచ్చని కోర్టు తెలిపింది. ఎన్నికల నామినేషన్లు దాఖలు చేయడానికి గడువు ముగిసే వరకు ఓటర్ల పేర్లు చేర్చడానికి అవకాశం ఉంటుందని విచారణలో పేర్కొన్నారు.

ఉత్తరప్రదేశ్, కేరళ, ఛత్తీస్‌గఢ్ రాష్ట్రాల్లో SIR ప్రక్రియను సవాలు చేస్తూ దాఖలైన పిటిషన్లపై విచారణ సందర్భంగా సుప్రీంకోర్టు ఈ వ్యాఖ్యలు చేసింది. మరోవైపు ఉత్తరప్రదేశ్‌లో ఫారం 7 స్వీకరణలో అధికార స్థాయిలో పొరపాట్లు జరిగినట్టు ఎన్నికల సంఘం కోర్టుకు అంగీకరించింది. ఆ పొరపాట్లను సరిదిద్దే చర్యలు తీసుకున్నట్టు ఎన్నికల సంఘం వివరించింది.

SIR ముగిసిన తర్వాత కూడా అర్హులైన పౌరులకు ఓటు హక్కు కల్పించే ప్రక్రియ కొనసాగుతుందన్న కోర్టు స్పష్టతకు ప్రాధాన్యం ఉంది.