నీటి వృధాను ఆపేందుకు 'Pani' యాప్.. వాటర్ వాలంటీర్‌గా నమోదు చేసుకోవచ్చు

నీటి వృధాను అరికట్టేందుకు ప్రభుత్వం 'Pani' మొబైల్ యాప్‌ను ప్రవేశపెట్టింది. ఈ యాప్ ద్వారా పైప్ లీకేజీలు, ట్యాంకుల ఓవర్‌ఫ్లో వంటి వాటిని ఎవరైనా అధికారుల దృష్టికి తీసుకెళ్లవచ్చు.

నగరాల్లో నీటి అవసరాలు రోజురోజుకూ పెరుగుతున్నాయి. పైప్ లీకేజీలు, ఓవర్‌ఫ్లో, తప్పుడు కనెక్షన్ల వల్ల నీరు వృధా అవుతోంది. తాగునీటితో వాహనాలు కడిగినా నీరు వృధా అవుతుంది.

యాప్‌ను డౌన్‌లోడ్ చేసుకుని వాటర్ వాలంటీర్‌గా పేరు, వివరాలు నమోదు చేసుకోవాలి. వివరాలు ఇచ్చిన తర్వాత SMS రూపంలో ధృవీకరణ వస్తుంది. దీనితో వాటర్ వాలంటీర్‌గా అర్హత లభిస్తుంది.

చుట్టుపక్కల లీకేజీ లేదా ఓవర్‌ఫ్లో కనిపిస్తే ఫోటో తీసి యాప్‌లో అప్‌లోడ్ చేయాలి. ఆ ఫిర్యాదు నేరుగా అధికారులకు చేరుతుంది. అధికారులు క్రాస్ చెక్ చేసి తగిన చర్య తీసుకుంటారు.

వాటర్ వాలంటీర్ల వివరాలను గోప్యంగా ఉంచుతామని అధికారులు తెలిపారు. నీటి పొదుపుకు చురుగ్గా తోడ్పాటు అందించే వాలంటీర్లను ముఖ్యమంత్రి చేతుల మీదగా సన్మానిస్తామని కూడా అధికారులు తెలిపారు.