తెలంగాణలో ప్రతి గ్రామ పంచాయతీకి అభివృద్ధి ప్రణాళిక, ప్రత్యేక వెబ్‌సైట్

తెలంగాణలోని ప్రతి గ్రామ పంచాయతీకి సమగ్ర అభివృద్ధి ప్రణాళిక (GP SAP) తీసుకురానున్నట్లు రాష్ట్ర ప్రభుత్వం ప్రకటించింది. ప్రతి గ్రామానికి ప్రత్యేక వెబ్‌సైట్, డాష్‌బోర్డ్ ఏర్పాటు చేయాలని ఆదేశించింది. పంచాయతీరాజ్ శాఖ ఈ విధానానికి రూపకల్పన చేసింది. GP SAP Rules 2026 ఖరారు చేస్తూ ప్రభుత్వం జీఓ జారీ చేసింది.

పంచాయతీరాజ్ శాఖ మంత్రి సీతక్క ఆదేశాలతో అధికారులు ఈ విధానాన్ని రూపొందించారు. దేశంలోనే తొలిసారి ఈ విధానం తీసుకొస్తున్నట్లు ప్రభుత్వం చెప్తోంది.

గ్రామానికి సంబంధించిన సమగ్ర సమాచారం ఒకే వేదికపైకి వస్తుంది. జనాభా, కుటుంబాల స్థితిగతులు, ఉపాధి, ఇళ్ల పరిస్థితి, భూమి లేని కూలీలు, పశు సంపద, ప్రభుత్వ ఆస్తులు ఇందులో ఉంటాయి. ప్రభుత్వ పథకాల లబ్ధిదారుల వివరాలు కూడా నమోదు అవుతాయి. రాబోయే ఐదేళ్లలో చేపట్టాల్సిన ప్రాజెక్టులను కూడా ఇందులో చేరుస్తారు.

గత ఏడాది వచ్చిన నిధులు, ప్రస్తుత అంచనాల ఆధారంగా ఆర్థిక ప్రణాళిక సిద్ధమవుతుంది. ఈ మొత్తానికి 125 శాతం మేర ప్రణాళిక రూపొందిస్తారు. ఆర్థిక సంవత్సరంలో చేపట్టాల్సిన పనులను నెలవారీగా పర్యవేక్షిస్తారు. పని ఎక్కడి వరకు వచ్చింది, ఎందుకు ఆలస్యం అవుతోంది అనే సమాచారం ఎప్పటికప్పుడు అప్‌డేట్ అవుతుంది.

ప్రతి గ్రామ పంచాయతీకి ప్రత్యేక వెబ్‌సైట్, డాష్‌బోర్డ్ అందుబాటులోకి వస్తాయి. గ్రామ వివరాలు, పనుల ప్రగతిని ప్రజలు, అధికారులు ఎక్కడి నుంచైనా ఆన్‌లైన్‌లో చూడవచ్చు. మండలం, జిల్లా కార్యాలయాల చుట్టూ తిరగాల్సిన అవసరం ఉండదు. ప్రతి నెల డేటాను అప్‌డేట్ చేస్తారు.

ప్రతి నెల పంచాయతీ సమావేశంలో మొదటి అజెండాగా GP SAP పై చర్చించాలని ప్రభుత్వం సూచించింది. మండలంలోని అన్ని జీపీల సమన్వయం, డేటా ఎంట్రీని పర్యవేక్షించాలని ఆదేశించింది. జిల్లా స్థాయిలో పనుల నాణ్యతను నిరంతరం మానిటరింగ్ చేయాలని జీఓలో పేర్కొంది.

తెలంగాణ పంచాయతీరాజ్ చట్టం 2018 సెక్షన్ 127 ప్రకారం శాఖల అధికారులు పంచాయతీ అడిగిన సమాచారాన్ని తప్పనిసరిగా ఇవ్వాలి. నిర్లక్ష్యం చేసినా, తప్పుడు లెక్కలు చూపించినా సెక్షన్ 135 ప్రకారం క్రమశిక్షణ చర్యలు తీసుకుంటారు.

ఇప్పటివరకు పంచాయతీరాజ్, గ్రామీణ మంచినీటి సరఫరా, SERP, ఉపాధి హామీ వంటి శాఖలు తమ పరిధిలోని పనులకు వేరువేరుగా ప్రణాళికలు వేసుకునేవి. దీంతో సమన్వయం లోపించి నిధులు సరిగా వినియోగం కాకపోయేవి. ఈ సమస్యలకు పరిష్కారంగానే ఈ విధానం తీసుకొచ్చినట్లు ప్రభుత్వం స్పష్టం చేసింది.

2047 నాటికి రాష్ట్రాన్ని మూడు ట్రిలియన్ డాలర్ల ఎకానమీగా మార్చాలన్న లక్ష్యంలో గ్రామీణ ఆర్థిక వ్యవస్థ పాత్ర కీలకమని ప్రభుత్వం తెలిపింది. వ్యవసాయం, పశు సంపద, జీవనోపాధుల విస్తరణకు ఈ ప్రణాళిక తోడ్పాటు అందిస్తుందని చెప్పింది.

ప్రస్తుతం రాష్ట్రంలో వివరాల నమోదు ప్రక్రియ కొనసాగుతోంది. ఇప్పటికే 90 శాతం గ్రామాల్లో ప్రొఫైల్ తయారైందని అధికారులు తెలిపారు.