కాకినాడ జిల్లాలో మున్సిపల్ ఎన్నికలు: పిఠాపురం, గొల్లప్రోలులో భద్రతా ఏర్పాట్లు పూర్తి

కాకినాడ జిల్లాలో మున్సిపల్ ఎన్నికలకు అధికారులు భద్రతా ఏర్పాట్లు పూర్తి చేశారు. జిల్లా కలెక్టర్ ఎంఎన్ హరేంద్ర ప్రసాద్, జిల్లా ఎస్పీ బిందు మాధవ్ ఆధ్వర్యంలో ఈ ఏర్పాట్లు చేపట్టారు.

పిఠాపురం మున్సిపాలిటీలో పోలింగ్ మెటీరియల్ పంపిణీ కార్యక్రమం పిఠాపురం పాలిటెక్నిక్ కళాశాలలో జరిగింది. ఈ కేంద్రం నుంచి 10 రూట్ మ్యాప్‌ల ప్రకారం మెటీరియల్ పంపిణీ చేశారు. రూట్ మొబైల్ బృందాలు పోలింగ్ అధికారులతో కలిసి మెటీరియల్ తీసుకుంటాయి. ఎస్కార్ట్‌తో ఆ మెటీరియల్‌ను సంబంధిత పోలింగ్ కేంద్రాలకు చేరుస్తాయి.

పిఠాపురం మున్సిపాలిటీలో 36 వార్డులు, 72 పోలింగ్ కేంద్రాలు ఉన్నాయి. మొత్తం ఓటర్లు 43,307 మంది. ఇందులో పురుషులు 20,875, మహిళలు 22,431, ఇతరులు ఒకరు. ఇక్కడ 72 మంది పీఓలు, 72 మంది ఏపీఓలు, 216 మంది ఇతర సిబ్బందిని నియమించారు.

గొల్లప్రోలు మున్సిపాలిటీలో 23 వార్డులు, 23 పోలింగ్ కేంద్రాలు ఉన్నాయి. మొత్తం 20,840 మంది ఓటర్లలో పురుషులు 10,376, మహిళలు 10,470 మంది ఉన్నారు. ఇక్కడ 23 మంది పీఓలు, 23 మంది ఏపీఓలు, 69 మంది ఇతర సిబ్బంది విధులు నిర్వహిస్తారు.

పోలింగ్ కేంద్రాల పరిసరాల్లో డ్రోన్ కెమెరాలతో నిఘా ఏర్పాటు చేశారు. రౌడీ షీటర్లపై బైండ్ ఓవర్ కేసులు నమోదు చేసినట్లు పిఠాపురం సీఐ సత్యనారాయణ తెలిపారు. మొబైల్ స్ట్రైకింగ్ ఫోర్స్, స్పెషల్ స్ట్రైకింగ్ ఫోర్స్ బృందాలను మోహరించారు.

పోలింగ్ కేంద్రాలకు 100 మీటర్ల పరిధిలో వాహనాలను అనుమతించరు. కేంద్రాల సమీపంలోని ఇళ్లకు ముందుగానే సమాచారం అందించారు. బయటి వ్యక్తులు అక్కడ గుమిగూడకూడదని పోలీసులు సూచించారు.