హైడ్రా పేరిట పేదల ఇళ్లు కూలుస్తున్నారని హరీష్ రావు ఆరోపణ

హైదరాబాద్ నార్సింగిలో 100 ఫీట్ల రోడ్డు అలైన్‌మెంట్ మార్పుపై BRS నేత, మాజీ మంత్రి హరీష్ రావు ఆరోపణలు చేశారు. HYDRAA పేరిట పేదల ఇండ్లను కూలుస్తున్నారని ఆయన అన్నారు.

మాజీ మంత్రి సబితా ఇంద్రారెడ్డి, ఎమ్మెల్యే సుధీర్ రెడ్డి, BRS నేతలతో కలిసి హరీష్ రావు ఆ ప్రాంతాన్ని పరిశీలించారు. స్థానికులకు ఇబ్బందులు తలెత్తకుండా చర్యలు తీసుకోవాలని ప్రభుత్వానికి సూచించారు.

ఒక బిల్డర్‌ను సంతోషపెట్టడానికి 4,000 కుటుంబాలను ఇబ్బందులకు గురిచేస్తున్నారని ఆయన ఆరోపించారు. HYDRAA పేరిట పేదల గుడిసెలను కూల్చి వారిని రోడ్డు మీదకు తీసుకొచ్చారని అన్నారు. హైదరాబాద్ చుట్టూ భూములను నిషేధిత జాబితాలో పెట్టి ప్రజలను భయభ్రాంతులకు గురిచేశారని ఆరోపించారు.

వెంటనే గెజిట్ నోటిఫికేషన్ రద్దు చేయాలని హరీష్ రావు డిమాండ్ చేశారు. పాత అలైన్‌మెంట్ ప్రకారం 100 ఫీట్ల రోడ్డు కొనసాగించాలని చెప్పారు. కొత్త గెజిట్ ఇచ్చే ముందు పబ్లిక్ హియరింగ్ నిర్వహించాలని, స్టేక్‌హోల్డర్లతో మాట్లాడాలని ఆయన అన్నారు.

పేపర్ నోటిఫికేషన్ ఇవ్వలేదని, పబ్లిక్ హియరింగ్ జరగలేదని హరీష్ రావు పేర్కొన్నారు. తాము మెమోరాండం ఇవ్వాలంటే అధికారులు స్వీకరించడానికి ముందుకు రాలేదని ఆయన చెప్పారు. ఈ ఆరోపణలపై ప్రభుత్వం, HYDRAA స్పందన తెలియాల్సి ఉంది.