కరీంనగర్‌లో ఓవర్‌లోడ్ గ్రానైట్ లారీలపై ఆందోళన.. చర్యలు కోరుతున్న ప్రయాణికులు

ఉమ్మడి కరీంనగర్ జిల్లాలో గ్రానైట్ లారీలు అధిక బరువు, అతివేగంతో వెళ్తున్నాయని ప్రయాణికులు ఆందోళన వ్యక్తం చేస్తున్నారు. ఈ లారీల నుంచి రోడ్డుపై బండరాళ్లు పడిపోతున్న ఘటనలు పునరావృతమవుతున్నాయి.

నిబంధనల ప్రకారం ఒక లారీపై 50 టన్నుల బండరాయిని మాత్రమే తరలించాలి. కానీ 60 నుంచి 75 టన్నుల వరకు తరలిస్తున్నారు. దీని వల్ల కోట్ల రూపాయలతో నిర్మించిన రోడ్లు దెబ్బతింటున్నాయి. రాయికి సరైన సపోర్ట్ ఇవ్వకపోవడంతో అతివేగంగా వెళ్లేటప్పుడు అది రోడ్డుపై పడిపోతోంది.

మూడు రోజుల క్రితం మానకొండ చెరువు సమీపంలో భారీ బండరాయి రోడ్డుపై పడింది. కరీంనగర్ నుంచి వరంగల్ వెళ్లే మార్గంలో ఈ ఘటన జరిగింది. అప్పుడు ఆ మార్గంలో వాహనాలు లేకపోవడంతో ప్రమాదం తప్పింది. దాదాపు గంటపాటు ట్రాఫిక్ నిలిచిపోయింది. భారీ యంత్రాల సాయంతో ఆ రాయిని తిరిగి లారీపైకి ఎక్కించారు.

గతంలోనూ ఇలాంటి ఘటనలు జరిగాయి. ఆరు నెలల క్రితం కరీంనగర్ జిల్లా కేంద్రంలోని ఖమ్మన్ వద్ద అర్ధరాత్రి బండరాయి పడింది. పెద్దపల్లి జిల్లా సుల్తానాబాద్‌లో ఒక ఇంటిపై రాయి పడింది. ఆ ఘటనల్లో ఎవరికీ ప్రమాదం జరగలేదు. తాజాగా మానకొండూరు మండలం కొత్తగట్టు సమీపంలో గ్రానైట్ లారీ ఢీకొని ముగ్గురు చనిపోయారు.

ఉమ్మడి కరీంనగర్ జిల్లాలో సుమారు 250 క్వారీలు నడుస్తున్నాయి. ఇక్కడి నుంచి బండరాళ్లను వివిధ రాష్ట్రాలకు తరలిస్తున్నారు. కరీంనగర్–వరంగల్, కరీంనగర్–హైదరాబాద్ రహదారులపై ఈ లారీల రాకపోకలు ఎక్కువగా ఉంటాయి. NTR బైపాస్ రోడ్డుపై గతంలో ఒక మహిళా టీచర్ స్కూటీని గ్రానైట్ లారీ ఢీకొట్టడంతో ఆమె చనిపోయారు. గతంలో ఆర్టీఓ అధికారులు నామమాత్రంగా తనిఖీలు చేసినట్టు ప్రయాణికులు చెప్తున్నారు. ఓవర్‌లోడ్ లారీలపై జరిమానా విధించాలని, యజమానులపై కేసులు నమోదు చేయాలని వారు కోరుతున్నారు.