యాదాద్రి భువనగిరిలో భారీ వర్షాలు: వరి పంట నష్టం, మార్కెట్లలో ధాన్యం తడిసి ముద్ద

యాదాద్రి భువనగిరి జిల్లాలో భారీ వర్షాలు కురిశాయి. ఈదురుగాలులతో కలిసి వచ్చిన వర్షానికి వరి పంట నేలరాలింది. చేతికొచ్చిన పంట కొట్టుకుపోవడంతో రైతులకు భారీ నష్టం జరిగింది.

చౌటుప్పల్, తిరుమలగిరి, భువనగిరి, ఆలేరు వ్యవసాయ మార్కెట్లలోకి తీసుకొచ్చిన ధాన్యం వర్షానికి తడిసి ముద్దయింది. చౌటుప్పల్ మార్కెట్‌లో దాదాపు 2,000 బస్తాల ధాన్యం నీటిలో మునిగింది. పంటను కప్పేందుకు టార్పలిన్ కూడా అందించడం లేదని రైతులు చెప్తున్నారు.

జిల్లాలో దాదాపు 500 ఎకరాల్లో వరి పంట కోత దశలో ఉంది. ఈ వర్షాల వల్ల ఆ పంట నేలరాలి నష్టం జరిగినట్టు రైతులు తెలిపారు. తుఫాను, అల్పపీడనం ప్రభావంతో జిల్లా వ్యాప్తంగా వర్షాలు కొనసాగుతున్నాయి.

తడిసిన ధాన్యాన్ని ప్రభుత్వం కొనుగోలు చేయాలని రైతులు డిమాండ్ చేస్తున్నారు. ధాన్యం రంగు మారితే తమ పంటను ఎవరు కొంటారని వారు ఆందోళన వ్యక్తం చేస్తున్నారు. కొందరు వ్యాపారులు తక్కువ ధరకు ధాన్యం కొంటున్నారని కూడా రైతులు ఆరోపిస్తున్నారు.