ఏలూరు కార్పొరేషన్ ఎన్నికలకు ఏర్పాట్లు పూర్తి: 62 డివిజన్లకు 255 పోలింగ్ కేంద్రాలు

ఏలూరు మునిసిపల్ కార్పొరేషన్ ఎన్నికల పోలింగ్ ఏర్పాట్లను అధికారులు పూర్తి చేశారు. కార్పొరేషన్ పరిధిలోని 62 డివిజన్లకు 255 పోలింగ్ కేంద్రాలు ఏర్పాటు చేశారు. పోలింగ్ రేపు జరగనున్నది.

ఏలూరు సీఆర్ రెడ్డి పబ్లిక్ స్కూల్‌లో ఎన్నికల సామాగ్రి పంపిణీ కేంద్రం ఏర్పాటు చేశారు. ఉదయం నుంచే ఎన్నికల సిబ్బంది ఇక్కడికి చేరుకున్నారు. వారికి పోలింగ్ కిట్లు, ఇతర సామాగ్రిని అధికారులు అందజేశారు. ఈరోజు సాయంత్రమే సిబ్బంది తమ పోలింగ్ కేంద్రాలకు చేరుకునేలా ఏర్పాట్లు చేశారు.

సిబ్బంది కోసం ప్రత్యేక బస్సులు, వాహనాలను కేటాయించారు. పోలింగ్ కేంద్రాలకు నేరుగా వెళ్లేలా రూట్ మ్యాప్ సిద్ధం చేశారు. సామాగ్రి తరలింపు సమయంలో ఎలాంటి అవాంతరాలు జరగకుండా పోలీసులు బందోబస్తు ఏర్పాటు చేశారు. సమస్యాత్మక, అత్యంత సమస్యాత్మక పోలింగ్ కేంద్రాలను పోలీసులు గుర్తించారు.

వాతావరణ పరిస్థితుల్లో మార్పులు ఉండటంతో సిబ్బందిని ముందుగానే పంపించారు. ఉమ్మడి పశ్చిమ గోదావరి జిల్లాలో ఏలూరు కార్పొరేషన్‌తో పాటు ఆకివీడు నగర పంచాయతీలోనూ ఎన్నికలు జరగనున్నాయి. నరసాపురం, నూజివీడు, జంగారెడ్డిగూడెం మున్సిపాలిటీల్లోనూ పోలింగ్ రేపే. ఈ ప్రాంతాల సిబ్బందికి కూడా ఈరోజే పోలింగ్ సామాగ్రి అందజేశారు.