అన్యాయంగా సంపాదించిన ధనంతో దానాలు చేస్తే పుణ్యం వస్తుందా? ధర్మశాస్త్రం ఏం చెబుతోంది

కూకట్పల్లికి చెందిన లలిత అనే భక్తురాలు అడిగిన ప్రశ్నకు ఒక ఆధ్యాత్మిక ప్రవచనంలో సమాధానం లభించింది. అన్యాయంగా సంపాదించిన ధనం దానం చేస్తే పుణ్యం వస్తుందా అనేది ఆమె ప్రశ్న.

ధర్మశాస్త్రం స్పష్టంగా చెబుతోంది: అన్యాయంగా ఆర్జించిన ధనం పదేళ్లు మాత్రమే నిలుస్తుంది, పదకొండో ఏట సమూలంగా నశిస్తుంది. అటువంటి ధనంతో భగవంతునికి ఏ కైంకర్యాలు చేసినా, ఆయన స్వీకరించడు. అది పాపమే.

ధర్మశాస్త్రం ధనార్జనను నిషేధించలేదు. డబ్బు లేకపోతే కుటుంబ సభ్యులు, స్నేహితులు కూడా దూరం అవుతారని హెచ్చరిస్తూనే, నైతికంగా మాత్రమే సంపాదించాలని చెబుతోంది. లంచాలు, వ్యాపార మోసాలు వంటి అన్యాయపు సంపాదనతో ఎంతటి దానమిచ్చినా పాపం నుంచి నిష్కృతి లభించదని ఈ బోధలో వివరించారు.