నిరసన ఘర్షణ కేసులో ఇల్తిజా ముఫ్తీని ప్రశ్నిస్తున్న శ్రీనగర్ పోలీసులు

పీడీపీ నేత ఇల్తిజా ముఫ్తీ శ్రీనగర్‌లోని కోఠీబాగ్ పోలీస్ స్టేషన్‌లో విచారణ ఎదుర్కొంటున్నారు. ఆగస్టు 4న లాల్ చౌక్‌లో జరిగిన నిరసన ఘర్షణకు సంబంధించి నమోదైన ఎఫ్‌ఐ‌ఆర్ కేసులో ఈ విచారణ చేపట్టారు. ఈ కేసులో ఇల్తిజాతో పాటు ఆమె తల్లి, పీడీపీ అధ్యక్షురాలు మెహబూబా ముఫ్తీ కూడా నిందితురాలిగా ఉన్నారు.

ఆగస్టు 4 సాయంత్రం మెహబూబా, ఇల్తిజాలు లాల్ చౌక్, ఎం‌ఏ రోడ్డు ప్రాంతంలో కొవ్వొత్తుల నిరసన చేపట్టేందుకు ప్రయత్నించారు. శాంతిభద్రతల సమస్యలు తలెత్తే అవకాశం ఉందని పోలీసులు వారిని అడ్డుకున్నారు. ఈ సమయంలో ఇల్తిజా ఒక మహిళా పోలీసు అధికారిని కరిచి, విధుల నిర్వహణకు అడ్డంకి కలిగించారని పోలీసులు తెలిపారు. ఈ ఘటనకు సంబంధించి బీఎన్‌ఎస్ లోని వివిధ సెక్షన్ల కింద కేసు నమోదు చేశారు.

పీడీపీ మాత్రం ఈ ఆరోపణలను ఖండించింది. శాంతియుత నిరసన తమ రాజ్యాంగ హక్కు అని, పోలీసులు అధిక బలప్రయోగం చేశారని ఆరోపించింది. ఈ ఘటనకు రాజకీయ రంగు వచ్చింది. ముఖ్యమంత్రి ఒమర్ అబ్దుల్లా ఈ వ్యవహారాన్ని ‘ఫిక్స్డ్ మ్యాచ్’గా అభివర్ణించారు. జనతా మంతర్‌లో మెహబూబా చేసిన వివాదాస్పద వ్యాఖ్యలను కప్పిపుచ్చుకునేందుకు, పీడీపీని తిరిగి ప్రాధాన్యంలోకి తీసుకురావడానికి బీజేపీతో కలిసి పీడీపీ ఈ నాటకం ఆడుతోందని ఆయన ఆరోపించారు.

2019 నుంచి పీడీపీకి వ్యతిరేకంగా చర్యలు కొనసాగుతున్నాయని, ఆర్టికల్ 370, 35ఏ పునరుద్ధరణ కోసం తమ పార్టీ నిరంతరం నిరసనలు చేస్తోందని పీడీపీ వర్గాలు తెలిపాయి. ఇల్తిజా ముఫ్తీ విచారణ ప్రస్తుతం కొనసాగుతోంది. పోలీసులు ఎలాంటి చర్యలు తీసుకుంటారో వేచి చూడాల్సి ఉంది.