ఆస్ట్రేలియాతో యురేనియం సరఫరా ఒప్పందం: భారత అణుశక్తి భద్రతకు కీలక మైలురాయి

ప్రధాని నరేంద్ర మోదీ ఆస్ట్రేలియా పర్యటనలో యురేనియం సరఫరాపై చారిత్రాత్మక ఒప్పందం కుదిరింది. మూడో భారత్-ఆస్ట్రేలియా వార్షిక సదస్సులో ఇరు దేశాల మధ్య రక్షణ, సముద్ర భద్రత, వాణిజ్యం, కీలకమైన ఖనిజాలు, స్వచ్ఛ ఇంధన రంగాల్లో 18 ప్రధాన ఒప్పందాలు కుదిరాయి. ఇందులో అతి ముఖ్యమైనది పౌర అణు ఒప్పందాన్ని అమలు చేస్తూ ఆస్ట్రేలియా నుంచి భారత్కు యురేనియం ఎగుమతికి అనుమతి లభించడం. 2014లో సంతకం చేసిన అణు ఒప్పందం ఇప్పటి వరకు పరిపాలనాపరమైన అడ్డంకులతో ఆగిపోయింది. ఇప్పుడు అంతర్జాతీయ అణు ఇంధన సంస్థ (IAEA) నిబంధనల ప్రకారం శాంతియుత వినియోగానికి మాత్రమే ఈ యురేనియం వినియోగిస్తారు. ప్రపంచంలో 28 శాతం యురేనియం నిల్వలు కలిగిన ఆస్ట్రేలియా అతిపెద్ద ఉత్పత్తిదారు. మరోవైపు భారత్ 2047 నాటికి 100 గిగావాట్ల అణు విద్యుత్ సామర్థ్యాన్ని లక్ష్యంగా పెట్టుకుంది. ప్రస్తుతం అణు విద్యుత్ దేశ విద్యుత్ ఉత్పత్తిలో కేవలం 3 శాతమే. ఆస్ట్రేలియా యురేనియం రాకతో ఇంధన భద్రత పెరగడంతో పాటు స్వచ్ఛ విద్యుత్ లక్ష్యాలకు ఊతం లభిస్తుంది. రక్షణ రంగంలో 2009 నాటి ఒప్పందాన్ని స్థానంలో కొత్త ఉమ్మడి ప్రకటనపై సంతకం చేశారు. సైనిక సహకారం, సముద్ర భద్రత, సైబర్ భద్రత, ఉగ్రవాద వ్యతిరేక పోరాటంలో భాగస్వామ్యాన్ని ఇది విస్తరిస్తుంది. ఇండో-పసిఫిక్ ప్రాంతంలో చైనా ప్రభావం పెరుగుతున్న నేపథ్యంలో ఈ ఒప్పందాలు వ్యూహాత్మక ప్రాధాన్యత సంతరించుకున్నాయి. పశ్చిమాసియాలో అమెరికా-ఇరాన్ ఘర్షణలతో చమురు మార్గాలు ప్రమాదంలో ఉన్న సమయంలో అణు ఇంధన ఒప్పందం భారత ఇంధన భద్రతకు బలమైన ప్రత్యామ్నాయంగా నిలుస్తుంది.