CEC జ్ఞానేష్ కుమార్ రాజీనామా డిమాండ్‌తో నవంబర్ 1న ఢిల్లీలో INDIA బ్లాక్ నిరసన

ప్రధాన ఎన్నికల కమిషనర్ (CEC) జ్ఞానేష్ కుమార్ రాజీనామా కోసం కాంగ్రెస్ నేతృత్వంలోని INDIA బ్లాక్ నవంబర్ 1న ఢిల్లీలో బహిరంగ సభ నిర్వహిస్తోంది. రామలీలా మైదానంలో ఈ నిరసన కార్యక్రమం జరగనుంది.

ఉదయం 10 గంటల నుంచి సాయంత్రం 5 గంటల వరకు కార్యక్రమం కొనసాగుతుందని నిర్వాహకులు చెప్తున్నారు. ఈ సభకు దేశవ్యాప్తంగా 10 లక్షల మందిని తరలించాలని కాంగ్రెస్ లక్ష్యంగా పెట్టుకుంది. ప్రతి రాష్ట్రం నుంచి నేతలు, కార్యకర్తలను ఢిల్లీకి పంపేందుకు ఏర్పాట్లు చేస్తోంది.

ఎన్నికల ప్రక్రియలో పెద్ద ఎత్తున అక్రమాలు జరిగాయని కాంగ్రెస్ నేతలు ఆరోపిస్తున్నారు. దేశవ్యాప్తంగా 13 కోట్ల ఓట్లు తొలగించారని వారి ఆరోపణ. అర్హత ఉన్న ప్రతి ఒక్కరికీ ఓటు హక్కు కోసం పోరాడుతున్నామని నేతలు చెప్తున్నారు. జ్ఞానేష్ కుమార్ రాజీనామా చేయాలని, లేదా ఆయనను పదవి నుంచి తొలగించే వరకు ఉద్యమం కొనసాగిస్తామని వారు తెలిపారు. ఎలక్ట్రానిక్ ఓటింగ్‌పై సందేహాలు ఉన్నందున పేపర్ బ్యాలెట్‌తో ఎన్నికలు జరపాలని కూడా వారు డిమాండ్ చేస్తున్నారు.

తెలంగాణ నుంచి కూడా పెద్ద సంఖ్యలో నేతలు ఢిల్లీ వెళ్లనున్నారు. ప్రత్యేక రైళ్లు కోరగా అనుమతి రాకపోవడంతో సికింద్రాబాద్ రైల్వే స్టేషన్ దగ్గర నిన్న మెరుపు ధర్నా చేశారు. బస్సుల్లో 10 వేల మందిని ఢిల్లీకి తరలించే ఏర్పాటు చేశామని కాంగ్రెస్ నేతలు తెలిపారు.

ఈ ఆరోపణలపై ఎన్నికల సంఘం స్పందన లభ్యం కాలేదు.