కేటీఆర్ పాదయాత్ర స్కెడ్యూల్‌పై ఇంకా స్పష్టత లేదు, BRS లో చర్చ

BRS వర్కింగ్ ప్రెసిడెంట్ కేటీఆర్ పాదయాత్ర స్కెడ్యూల్‌పై ఇంకా స్పష్టత రాలేదు. యాత్రను ఎప్పటి నుంచి ప్రారంభించాలనే దానిపై పార్టీలో చర్చ కొనసాగుతోంది.

ఎన్నికలకు ఏడాది ముందు యాత్ర ప్రారంభించాలని కొందరు నేతలు అభిప్రాయపడుతున్నారు. ప్రస్తుత కరువు పరిస్థితుల నేపథ్యంలో ఇప్పుడే క్షేత్రస్థాయిలోకి వెళ్లాలని మరికొందరు వాదిస్తున్నారు. తాగునీరు, సాగునీటి సమస్యలు, రైతులు ఎదుర్కొంటున్న ఇబ్బందులను ప్రజల ముందుకు తీసుకెళ్లడానికి ఇదే సరైన సమయమని వారు చెప్తున్నారు.

కరువు కాంగ్రెస్ పాలన వల్ల వచ్చిందనే అంశాన్ని ప్రజల్లోకి బలంగా తీసుకెళ్లాలని BRS భావిస్తోంది. మార్చి 2027 నుంచి పాదయాత్ర మొదటి విడత ప్రారంభిస్తే గ్రామాల్లో ప్రజల సమస్యలను నేరుగా తెలుసుకోవచ్చనే అభిప్రాయం ఉంది.

అయితే కొందరు సీనియర్ నేతలు భిన్న అభిప్రాయం వ్యక్తం చేస్తున్నట్లు తెలుస్తోంది. సాధారణ ఎన్నికలకు ఇంకా రెండేళ్ల సమయం ఉందని వారు చెప్తున్నారు. ఇప్పుడే యాత్ర చేపడితే పోలింగ్ సమయం వరకు దాని ప్రభావాన్ని కొనసాగించడం సవాలని వారు భావిస్తున్నారు. ఎన్నికలకు ఏడాది ముందు యాత్ర చేస్తే ఎక్కువ ప్రభావం ఉంటుందని కేటీఆర్ కూడా కొందరు నేతలతో ప్రస్తావించినట్లు సమాచారం.

2027లో ఖచ్చితంగా పాదయాత్ర చేస్తానని కేటీఆర్ చెప్పినట్లు తెలుస్తోంది. ఎక్కడి నుంచి ఎక్కడి వరకు, ఎప్పుడు చేపట్టాలనే విషయాలపై పార్టీ పెద్దలతో మాట్లాడి నిర్ణయం తీసుకున్నట్లు ఆయన పేర్కొన్నట్లు సమాచారం.

మరోవైపు పార్టీ అధినేత కేసీఆర్ బస్ యాత్ర ఏర్పాట్లు కూడా జరుగుతున్నట్లు తెలుస్తోంది. బస్సుకు బుల్లెట్ ప్రూఫ్ సదుపాయం కల్పించేందుకు దానిని చెన్నైకి పంపినట్లు సమాచారం. ముందుగా కేటీఆర్ పాదయాత్ర, ఎన్నికల ప్రచార సమయంలో కేసీఆర్ బస్ యాత్ర చేపట్టాలనే వ్యూహంపై పార్టీ దృష్టి పెట్టింది.