మంచిర్యాల జిల్లాలో తాగునీటి ఎద్దడి; ఖాళీ బిందెలతో మహిళల ఆందోళన

మంచిర్యాల జిల్లా చెన్నూరు మండలం ఎర్రగుంటపల్లి గ్రామంలో తాగునీటి ఎద్దడి తీవ్రమైంది. బోరుబావి మోటారును తొలగించడంతో మహిళలు ఖాళీ బిందెలతో బోరుబావి వద్ద ఆందోళన చేపట్టారు.

గత నాలుగైదు రోజులుగా గ్రామానికి తాగునీరు రావడం లేదని మహిళలు చెప్తున్నారు. సర్పంచ్‌కు ఫిర్యాదు చేసినా పట్టించుకోలేదని వారు ఆగ్రహం వ్యక్తం చేశారు. తొలగించిన మోటారును వెంటనే తిరిగి అమర్చాలని వారు డిమాండ్ చేశారు.

ఈ గ్రామం చెన్నూరు నియోజకవర్గంలో ఉంది. ఈ నియోజకవర్గానికి మంత్రి వివేక్ ప్రాతినిధ్యం వహిస్తున్నారు. గ్రామంలో సర్పంచ్ భర్త రామయ్య, ఉప సర్పంచ్ మధ్య విభేదాలు ఉన్నాయని తెలుస్తోంది.

గతంలో పాడైపోయిన బోరు మోటారు స్థానంలో ఉప సర్పంచ్ వేరే చోటు నుంచి మోటారు తెచ్చి అమర్చారని సమాచారం. దానిని సర్పంచ్ భర్త రామయ్య ఎవరికీ చెప్పకుండా నాలుగు రోజుల క్రితం తొలగించారని మహిళలు ఆరోపిస్తున్నారు. ఈ ఆరోపణలపై సర్పంచ్ లేదా ఆమె భర్త వైపు నుంచి స్పందన లభ్యం కాలేదు.