మంచిర్యాలలో పట్టు పురుగుల పెంపకంపై ఆంక్షలు: రైతుల రాస్తారోకో

మంచిర్యాల జిల్లా చెన్నూరు మండలం కిష్టంపేటలో పట్టు పురుగుల పెంపకంపై అటవీ అధికారులు విధించిన ఆంక్షలను నిరసిస్తూ రైతులు రాస్తారోకో చేపట్టారు. కిష్టంపేట అర్బన్ పార్క్ సమీపంలోని 63వ నెంబర్ జాతీయ రహదారిపై వారు నిరసన తెలిపారు.

అటవీ ప్రాంతంలోకి వెళ్లే దారిని మూసివేయడంపై రైతులు ఆగ్రహం వ్యక్తం చేశారు. తాతల కాలం నుంచి పట్టు పురుగుల పెంపకం ద్వారా ఉపాధి పొందుతున్నామని వారు తెలిపారు. ముందుగా అనుమతి ఇచ్చి, తర్వాత ఆంక్షలు విధించడం సరికాదని రైతులు అన్నారు. అధికారుల వ్యవహారంతో తమ జీవన ఉపాధి కోల్పోతున్నామని వారు ఆవేదన వ్యక్తం చేశారు.

ఈ ఆంక్షలపై అటవీ శాఖ స్పందన లభ్యం కాలేదు. రైతుల ఆందోళనతో రహదారిపై ఇరువైపులా వాహనాల రాకపోకలు నిలిచిపోయాయి. పోలీసులు రైతులకు నచ్చచెప్పి ఆందోళనను విరమింపజేశారు.