కామన్వెల్త్ గేమ్స్ 2026: 39 పతకాలతో భారత్‌కు నాలుగో స్థానం, బాక్సింగ్‌లో 7 స్వర్ణాలు

గ్లాస్గో వేదికగా జరిగిన 2026 కామన్వెల్త్ గేమ్స్‌లో భారత్ 39 పతకాలు సాధించి నాలుగో స్థానంలో నిలిచింది. భారత ఖాతాలో 13 స్వర్ణాలు, 17 రజతాలు, 9 కాంస్య పతకాలు చేరాయి. ఆస్ట్రేలియా 70 స్వర్ణాలతో సహా మొత్తం 171 పతకాలతో అగ్రస్థానంలో నిలవగా, ఇంగ్లండ్, కెనడాలు వరుసగా రెండు, మూడు స్థానాల్లో నిలిచాయి.

సంప్రదాయకంగా భారత్‌కు బలమైన షూటింగ్, రెజ్లింగ్ వంటి క్రీడాంశాలు ఈసారి తొలగించినా, భారత అథ్లెట్లు ఆకట్టుకున్నారు. ముఖ్యంగా బాక్సింగ్ భారత పతకాల వేటలో కీలకపాత్ర పోషించింది. బాక్సర్లు ఏడు స్వర్ణాలు, మూడు రజతాలు సహా మొత్తం 10 పతకాలు అందించారు. ట్రాక్ అండ్ ఫీల్డ్, పారా అథ్లెట్లు కూడా పలు పతకాలు సాధించగా, జూడోకాలు కూడా కీలక పతకాలు తెచ్చిపెట్టారు.

అయితే, గేమ్స్ ప్రారంభానికి ముందు భారత జూడోకా తుల్లీన్‌పై ఉన్నట్టుండి సస్పెన్షన్ వేటు పడటం భారత శిబిరానికి ఎదురుదెబ్బగా మారింది. యాంటీ డోపింగ్ నిబంధనల ప్రకారం మూడుసార్లు వేర్ ఎబౌట్స్ వివరాలు చూపించడంలో విఫలమవడంతో ఆమెపై సస్పెన్షన్ విధించారు.

గ్లాస్గో అధ్యాయం ముగియడంతో, 2030లో అహ్మదాబాద్‌లో జరిగే తదుపరి కామన్వెల్త్ గేమ్స్‌పై భారత దృష్టి మళ్లింది. ఈసారి స్వదేశంలో జరిగే ఈ క్రీడల్లో మరింత మెరుగైన ప్రదర్శన చేయాలని భారత్ లక్ష్యంగా పెట్టుకుంది.