వెంట్రుకల వ్యాపారం: గ్లోబల్ మార్కెట్‌లో భారత్ కీలక సరఫరాదారు

అంతర్జాతీయ మార్కెట్లో మానవ వెంట్రుకలకు భారీ డిమాండ్ ఏర్పడింది. వేల కోట్ల డాలర్ల ఈ వ్యాపారానికి భారత్, చైనాలు ప్రధాన చోదకాలుగా నిలిచాయి.

చైనాలోని శుచాంగ్ నగరం ప్రపంచ విగ్గుల రాజధానిగా పేరుగాంచింది. ఇక్కడ రెబెకా హెయిర్ అనే సంస్థ ప్రపంచంలోనే అతిపెద్ద విగ్ తయారీదారుగా ఉంది. రసాయనాలు లేకుండా సహజంగా పెరిగిన పొడవైన జుట్టుకు విపరీతమైన గిరాకీ ఉంది. ఒకప్పుడు కళాకారులు మాత్రమే విగ్గులు వాడేవారు. ఇప్పుడు ఫ్యాషన్, సినిమాలతో పాటు అనారోగ్యంతో జుట్టు కోల్పోయిన వారూ వీటిని వాడుతున్నారు.

చైనాలో స్థానికంగా జుట్టు సేకరణ తగ్గడంతో భారత్, ఇండోనేషియా, మయన్మార్ నుంచి దిగుమతి పెరిగింది. రెబెకా హెయిర్‌కు అవసరమయ్యే జుట్టులో 60% పైగా భారత్ నుంచే వస్తోంది. ముఖ్యంగా పశ్చిమ బెంగాల్ ఈ ఎగుమతి వ్యాపారానికి పెద్ద కేంద్రంగా మారింది. ఇక్కడి కార్మికులు రాలిన జుట్టును సేకరించి, చిక్కులు తీసి, పొడవును బట్టి వేరుచేసి ముద్దలుగా చుడతారు. ఆ తర్వాత వీటిని చైనాకు ఎగుమతి చేస్తారు.

చైనా ఫ్యాక్టరీల్లో జుట్టుకు రంగులు వేసి విగ్గులుగా మార్చుతారు. వీటికి బ్రెజిల్ అతిపెద్ద కస్టమర్. బ్రెజిల్ బ్యూటీ సెలూన్లలో చైనా విగ్‌లకు విపరీతమైన డిమాండ్ ఉంది. శుచాంగ్ నగరంలో 4 వేలకు పైగా కంపెనీలు 3 లక్షల మందికి ఉపాధి కల్పిస్తున్నాయి.