పీఓకేను ‘పాకిస్తాన్ కాశ్మీర్’గా పేర్కొన్న న్యూయార్క్ టైమ్స్ కథనంపై భారత్ తీవ్ర అభ్యంతరం

న్యూయార్క్ టైమ్స్ పత్రిక ఒక కథనంలో పాకిస్తాన్ ఆక్రమిత కాశ్మీర్ ను ‘పాకిస్తాన్ కాశ్మీర్’ అని పేర్కొనడంపై భారత్ తీవ్ర అభ్యంతరం వ్యక్తం చేసింది.

అమెరికాలోని భారత రాయభార కార్యాలయం ఎక్స్ వేదికగా స్పందిస్తూ, ఆ ప్రాంతం పాకిస్తాన్ ఆక్రమిత కాశ్మీర్ అని, అది పాకిస్తాన్ కాశ్మీర్ కాదని స్పష్టం చేసింది. జమ్మూ కాశ్మీర్, లద్దాక్ ప్రాంతాలు ఎప్పటికీ భారత్‌లో భాగంగా ఉంటాయని కూడా తెలిపింది.

‘స్థానిక ఎన్నికల వేళ పాకిస్తాన్ కాశ్మీర్‌లో ఘర్షణలు’ అనే శీర్షికతో ఈ కథనం ప్రచురితమైంది. ఇందులో మీర్‌పూర్ ప్రాంతంలో పోలీసుల తీరుపై జరిగిన నిరసనలను ప్రస్తావించింది.

భారత విదేశాంగ శాఖ ఈ నిరసనలను పాకిస్తాన్ సాగిస్తున్న వ్యవస్థాగత దోపిడికి, పరిపాలనాపరమైన అణచివేతకు నిదర్శనంగా పేర్కొంది. అక్కడ మానవ హక్కుల ఉల్లంఘనలను కప్పిపుచ్చడానికి పాకిస్తాన్ స్థానిక ఎన్నికల నాటకాన్ని ప్రదర్శిస్తోందని తెలిపింది.