డీజిల్‌లో 15% ఐసోబ్యూటనాల్ మిశ్రమానికి కేంద్రం ప్రణాళిక

దేశంలో డీజిల్‌లో 15% ఐసోబ్యూటనాల్ కలపడానికి కేంద్ర ప్రభుత్వం ప్రణాళికలు సిద్ధం చేస్తోంది. పెట్రోల్‌లో ఇథనాల్ మిశ్రమాన్ని విజయవంతంగా అమలు చేసిన తర్వాత ఇప్పుడు డీజిల్‌లో కూడా ప్రత్యామ్నాయ ఇంధనాన్ని ప్రవేశపెట్టాలని చూస్తోంది.

ఈ విషయాన్ని కేంద్ర రోడ్డు రవాణా, జాతీయ రహదారుల మంత్రి నితిన్ గడ్కరీ వెల్లడించారు. డీజిల్‌లో నేరుగా ఇథనాల్ కలపలేమని, అందుకే ఇథనాల్ ను ఐసోబ్యూటనాల్ గా మార్చి మిశ్రమం చేయడంపై దృష్టి పెట్టామని ఆయన తెలిపారు. ఐసోబ్యూటనాల్ డీజిల్‌కు సమర్థవంతమైన ప్రత్యామ్నాయంగా మారుతుందని గడ్కరీ అభిప్రాయపడ్డారు.

రెండు పైలట్ ప్రాజెక్టులు విజయవంతమయ్యాయి. వాటి ఫలితాల ఆధారంగా వాణిజ్య స్థాయిలో ఈ మిశ్రమాన్ని అమలు చేసే దిశగా కేంద్రం చర్యలు తీసుకుంటోంది. ఇప్పటికే పెట్రోల్‌లో ఇథనాల్ బ్లెండింగ్ లక్ష్యాన్ని 2025 డిసెంబర్ నాటికే చేరుకోవడం వల్ల రూ.1.9 లక్షల కోట్ల విదేశీ మారకద్రవ్యం ఆదా అయింది.

మరోవైపు ఇథనాల్ ఉత్పత్తికి ఉపయోగపడే పంటల వల్ల రైతులకు అదనపు లాభం వస్తుందని గడ్కరీ చెప్పారు. అయితే ఇథనాల్ మిశ్రమం ఉన్న పెట్రోల్ వాడకంతో వాహనాల ఇంజిన్లు దెబ్బతింటున్నాయని, బీమా కంపెనీలు అభ్యంతరాలు వ్యక్తం చేస్తున్నాయని సమాచారం ఉంది. ఈ ఆందోళనలను పరిష్కరించిన తర్వాతే డీజిల్‌లో మిశ్రమాన్ని పూర్తిగా అమలు చేయాలని కేంద్రం యోచిస్తోంది.