పశ్చిమ గోదావరి జిల్లా ఆచంటలో బీసీవై నేత రామచంద్ర యాదవ్ జాబ్ మేళా ప్రకటన

అల్లూరి సీతారామరాజు జయంతి సందర్భంగా పశ్చిమ గోదావరి జిల్లా ఆచంట నియోజకవర్గంలో కారుణ్య ట్రస్ట్ సేవా కార్యక్రమం ఏర్పాటు చేసింది. ఈ కార్యక్రమంలో బీసీవై పార్టీ నేత రామచంద్ర యాదవ్ పాల్గొన్నారు. 20 ఏళ్లుగా సేవా కార్యక్రమాలు నిర్వహిస్తున్న ట్రస్ట్ వ్యవస్థాపకుడు తుమ్మా నాగేశ్వరరావు అని ఆయన తెలిపారు.

రామచంద్ర యాదవ్ ఈ సందర్భంగా మాట్లాడుతూ, నియోజకవర్గంలో నిరుద్యోగ సమస్య పరిష్కారం కోసం కారుణ్య ట్రస్ట్ ఆధ్వర్యంలో త్వరలోనే ఓ పెద్ద జాబ్ మేళా ఏర్పాటు చేస్తామని ప్రకటించారు. 100కు పైగా కంపెనీలను ఈ మేళాకు ఆహ్వానించనున్నట్లు తెలిపారు. యువతీయువకులకు ఉద్యోగ ఉపాధి అవకాశాలు కల్పించడమే లక్ష్యమన్నారు.

ప్రస్తుతం నియోజకవర్గంలో పాదయాత్ర చేస్తూ ప్రజల సమస్యలు స్వయంగా తెలుసుకుంటున్నట్లు రామచంద్ర యాదవ్ చెప్పారు. నాగేశ్వరరావు ప్రజాజీవితంలోకి రావాలని, అప్పుడు ఈ ప్రాంతాభివృద్ధి మరింత వేగం పుంజుకుంటుందని ఆయన అభిప్రాయపడ్డారు. అలాగే ఆచంటలోని ప్రాచీన శ్రీ పార్వతీ సమేత స్వయంభు రామలింగేశ్వర స్వామి ఆలయాన్ని సందర్శించామని, తనను ఆహ్వానించిన బీసీవై నేత గణేష్ యాదవ్‌కు కృతజ్ఞతలు తెలిపారు.