విదేశీ కంపెనీలకు 15 ఏళ్ల పన్ను మినహాయింపు: మోదీ ప్రభుత్వం కొత్త బిల్లు

ప్రధాని నరేంద్ర మోదీ ప్రభుత్వం విదేశీ కంపెనీలకు భారీ పన్ను ప్రయోజనాలు కల్పించే కొత్త బిల్లును తీసుకురానుంది. టాక్సేషన్ అండ్ అదర్ లాస్ అమెండ్మెంట్ బిల్లు పేరుతో రూపొందించిన ఈ ముసాయిదాలో భారత తయారీ రంగానికి యంత్రాలు, విడిభాగాలు సరఫరా చేసే విదేశీ కంపెనీలకు మార్చి 2041 వరకు పన్ను మినహాయింపు ఇవ్వనున్నారు. ప్రస్తుత పన్ను చట్టాల ప్రకారం, ఓ విదేశీ కంపెనీ తన యంత్రాలను కాంట్రాక్ట్ తయారీదారుకు అప్పగించినప్పటికీ, ఆ యంత్రాల యాజమాన్యం భారత్‌లో వ్యాపార అనుసంధానంగా పరిగణించబడే ప్రమాదం ఉండడంతో, పన్ను అధికారులు ఆ కంపెనీ లాభాలపైనా పన్ను విధించే అవకాశం ఉండేది. ఈ అస్పష్టతతో చాలా ప్రపంచ కంపెనీలు భారత్‌లో ఖరీదైన పరికరాలు ఉంచేందుకు వెనుకాడేవి. ఈ బిల్లు ఆ సందేహాన్ని నివృత్తి చేస్తుంది.

ఫోన్లు, ల్యాప్‌టాప్‌లు, టాబ్లెట్లు, వేరబుల్స్ తయారీకి అవసరమైన విడిభాగాల నిల్వ, సరఫరాపై కూడా పన్ను మినహాయింపు లభిస్తుంది. అయితే, ఈ లావాదేవీలు కస్టమ్స్ బాండెడ్ వేర్‌హౌస్‌ల ద్వారా జరగాలి. డేటా సెంటర్ల విషయంలోనూ ఇదే తరహా సౌలభ్యం కల్పిస్తారు – విదేశీ కంపెనీలు సొంతంగా సౌకర్యాలు నిర్మించుకోకుండా లీజుకు తీసుకోవచ్చు. ఇది భారీ పెట్టుబడి అవసరం లేకుండానే ఇక్కడ వ్యాపారం ప్రారంభించే అవకాశాన్ని ఇస్తుంది.

విదేశీ నిధుల (ఆఫ్‌షోర్ ఫండ్స్) విషయంలోనూ ప్రభుత్వం గణనీయమైన సడలింపులు ఇవ్వనుంది. ఇప్పటివరకు ఇటువంటి నిధులు పన్ను ప్రయోజనాలు పొందాలంటే 25 మంది పెట్టుబడిదారులు, ఒక్క పెట్టుబడి 10 శాతం మించకూడదు, కనీస నిధి పరిమాణం రూ.100 కోట్లు వంటి 13 కఠిన షరతులు ఉండేవి. వీటిలో 8 షరతులను ఎత్తివేయడం ద్వారా భారత్‌ను సింగపూర్, దుబాయ్ తరహా అంతర్జాతీయ ఆర్థిక కేంద్రంగా మార్చాలని ప్రభుత్వం లక్ష్యంగా పెట్టుకుంది. కరోనా తర్వాత చైనాపై ఆధారపడటాన్ని తగ్గించుకుంటున్న ప్రపంచ కంపెనీలు భారత్ వంటి ప్రత్యామ్నాయ కేంద్రాలవైపు చూస్తున్న తరుణంలో ఈ బిల్లు కీలకం కానుంది. ఇప్పటికే యాపిల్ ఐఫోన్ల ఉత్పత్తిలో భారత్ వాటా 6 శాతం నుంచి 26 శాతానికి చేరింది. ఈ బిల్లు ఈ వారం పార్లమెంటులో ప్రవేశపెట్టే అవకాశం ఉంది.