అదనపు లగేజీని టికెట్ బుకింగ్ సమయంలోనే ఆన్‌లైన్‌లో బుక్ చేసుకోవచ్చు: రైల్వే శాఖ

భారతీయ రైల్వే ప్రయాణికుల కోసం అదనపు లగేజీ బుకింగ్ ప్రక్రియను సులభతరం చేస్తూ కొత్త ఆన్లైన్ సదుపాయాన్ని అందుబాటులోకి తెచ్చింది. కన్ఫర్మ్ రిజర్వ్డ్ టికెట్లు ఉన్న ప్రయాణికులు ఇకపై టికెట్ బుక్ చేసే సమయంలోనే IRCTC ప్లాట్ఫామ్ ద్వారా అదనపు లగేజీని బుక్ చేసుకోవచ్చు. ఈ విధానం నేటి నుంచి దేశవ్యాప్తంగా అమల్లోకి వచ్చింది.

ఈ సౌకర్యం కేవలం కన్ఫర్మ్డ్ రిజర్వ్ టికెట్ ఉన్న ప్రయాణికులకు మాత్రమే వర్తిస్తుంది. వారు ప్రయాణించే రిజర్వ్డ్ కంపార్ట్మెంట్లో లగేజీని తీసుకెళ్లాలి. టికెట్ బుకింగ్ సమయంలో ఉచిత లగేజీ పరిమితిని మించిన వస్తువుల వివరాలు ఇవ్వాలి. సిస్టమ్ తరగతుల వారీగా ఉచిత పరిమితి, గరిష్ఠ బరువు, చార్జీలు, జరిమానా నిబంధనలను ప్రదర్శిస్తుంది.

తరగతుల వారీగా లగేజీ పరిమితులు: ఏసీ ఫస్ట్ క్లాస్‌లో 70 కిలోల వరకు ఉచితం, అదనపు రుసుము చెల్లించి గరిష్టంగా 150 కిలోల వరకు తీసుకెళ్లవచ్చు. ఫస్ట్ క్లాస్‌లో 50 కిలోల వరకు ఉచితం, 100 కిలోల వరకు అనుమతి. స్లీపర్ క్లాస్‌లో 40 కిలోల వరకు ఉచితం, 80 కిలోల వరకు; సెకండ్ క్లాస్‌లో 35 కిలోల వరకు ఉచితం, 70 కిలోల వరకు. ఏసీ 3-టైర్, ఏసీ ఎకానమీ, ఏసీ చైర్ కార్ తరగతుల్లో ఉచిత పరిమితి 40 కిలోలు మాత్రమే, ఈ తరగతుల్లో అదనపు లగేజీ బుకింగ్ సౌకర్యం లేదు.

లగేజీని పార్సెల్‌గా పంపించాలంటే, ఇండియన్ రైల్వేస్ పార్సెల్స్ పోర్టల్‌లో లాగిన్ అయ్యి, బయలుదేరే మరియు గమ్య స్టేషన్లు, రైలు వివరాలు ఎంచుకుంటారు. ఫార్వర్డింగ్ నోట్ పూరించి, అంచనా చార్జీలు చెక్ చేయాలి. ఆన్లైన్ ఫారం సమర్పించిన తర్వాత ప్రింటవుట్ తో పాటు లగేజీని సంబంధిత స్టేషన్ పార్సెల్ కార్యాలయంలో అప్పగించాలి. అక్కడ తూకం వేసి ఫైనల్ చార్జీలు లెక్కిస్తారు. చెల్లింపు తర్వాత రైల్వే రశీదు లభిస్తుంది. ట్రాక్ అండ్ ట్రేస్ సదుపాయం ద్వారా లగేజీని ట్రాక్ చేయవచ్చు. గమ్యానికి చేరినప్పుడు SMS ద్వారా సమాచారం వస్తుంది.

గతంలో, అదనపు లగేజీ ఉన్న ప్రయాణికులు రైల్వే స్టేషన్‌లోని పార్సెల్ ఆఫీసుకు వెళ్లి బుకింగ్ చేయాల్సి వచ్చేది. ఈ ప్రక్రియ సమయం తీసుకునేది. దీన్ని సులభతరం చేయడానికి రైల్వే శాఖ ఈ ఆన్లైన్ సదుపాయాన్ని తీసుకొచ్చింది. సీఆర్ఐఎస్ (CRIS) సంస్థ ఈ వ్యవస్థను అభివృద్ధి చేసింది. రైల్వే బోర్డు అన్ని జోనల్ రైల్వేలకు దీన్ని అమలు చేయాలని ఆదేశించింది.