భారత రియల్ ఎస్టేట్‌లో స్థిరత్వం: Knight Frank-NAREDCO నివేదిక

భారత రియల్ ఎస్టేట్ రంగంలో స్థిరమైన సంకేతాలు కనిపిస్తున్నాయని Knight Frank-NAREDCO రియల్ ఎస్టేట్ సెంటిమెంట్ ఇండెక్స్ తాజా నివేదిక తెలిపింది. ప్రపంచ భౌగోళిక ఉద్రిక్తతలు, ద్రవ్యోల్బణం ఒత్తిళ్లు ఉన్నప్పటికీ ఈ రంగం దీర్ఘకాలిక వృద్ధి దిశగా ఉందని నివేదిక పేర్కొంది.

ప్రస్తుత సెంటిమెంట్ స్కోరు గత త్రైమాసికంలోని 49 నుంచి 48కి తగ్గింది. అయితే రాబోయే ఆరు నెలల ఫ్యూచర్ సెంటిమెంట్ స్కోరు 50 దగ్గర స్థిరంగా కొనసాగింది. డెవలపర్ల విశ్వాసాన్ని సూచించే స్కోరు 51గా ఉంది. బ్యాంకులు, ఆర్థిక సంస్థలు, ప్రైవేట్ ఈక్విటీ ఇన్వెస్టర్ల సెంటిమెంట్ స్కోరు 50 నుంచి 53కు పెరిగింది.

ఈ ఏడాది తొలి ఆరు నెలల్లో దేశవ్యాప్తంగా ఇళ్ల విక్రయాలు స్వల్పంగా పెరిగాయి. నిర్మాణ వ్యయం పెరుగుతున్నప్పటికీ ఇళ్ల ధరలు స్థిరంగా ఉన్నాయి. రాబోయే రోజుల్లో ప్రాపర్టీ ధరలు పెరుగుతాయని 74% వాటాదారులు అంచనా వేశారు. కార్యాలయాల లీజింగ్ ప్రధాన బలంగా కొనసాగుతోంది. ఈ ఏడాది తొలి అర్ధభాగంలో 4.88 కోట్ల చదరపు అడుగుల కార్యాలయ లీజింగ్ నమోదయింది. కార్యాలయ అద్దెలు పెరుగుతాయని లేదా ప్రస్తుత స్థాయిలో ఉంటాయని 81% వాటాదారులు భావిస్తున్నారు.

హైదరాబాద్ రియల్ ఎస్టేట్ ఎప్పుడూ స్థిరంగా ఉంటుందని నివేదిక పేర్కొంది. హైదరాబాద్ మెట్రో రెండో దశ విస్తరణ, ఐటీ విస్తరణ, మెరుగైన రోడ్డు కనెక్టివిటీ హైదరాబాద్‌కు అనుకూలంగా ఉన్నాయి.

స్వల్పకాలిక సవాళ్లు ఉన్నప్పటికీ భారత రియల్ ఎస్టేట్ రంగం బలమైన పునాదులపై ఉందని నివేదిక స్పష్టం చేసింది. వడ్డీ రేట్లు స్థిరపడటం, దేశీయ ఆర్థిక కార్యకలాపాలు ఊపందుకోవడం రంగానికి అనుకూలమని విశ్లేషకులు భావిస్తున్నారు.