ఐదు నగరాల్లో ఇందిరమ్మ టవర్లు: డిసెంబర్ 5 వరకు దరఖాస్తులు

హైదరాబాద్ తరహాలో ఇందిరమ్మ టవర్లను మరో ఐదు నగరాలకు విస్తరించే ప్రక్రియను తెలంగాణ ప్రభుత్వం ప్రారంభించింది. నిజామాబాద్, నల్గొండ, మహబూబ్‌నగర్, వరంగల్, హనుమకొండల్లో లబ్ధిదారుల ఎంపికను హౌసింగ్ బోర్డు చేపట్టింది. డిసెంబర్ 5 వరకు మీసేవ ద్వారా దరఖాస్తులు స్వీకరిస్తారు.

హౌసింగ్ బోర్డు భూముల్లో ₹204 కోట్లతో 2,400 LIG ఫ్లాట్లు నిర్మిస్తారు. మొదటి విడతలో ఒక్కో జిల్లాలో ఐదు టవర్లు ఉంటాయి. ఒక్కో జిల్లాలో 480 ఫ్లాట్లు కేటాయిస్తారు. ఒక్కో ఫ్లాట్ నిర్మాణ వ్యయం ₹8.5 లక్షలు. ఇందులో ₹5 లక్షలు ఇందిరమ్మ పథకం కింద ప్రభుత్వం భరిస్తుంది. మిగిలిన ₹3.5 లక్షలను లబ్ధిదారులు నాలుగు విడతల్లో చెల్లించాలి.

దరఖాస్తుకు అర్హతలు నిర్దిష్టంగా ఉన్నాయి. వార్షిక ఆదాయం ₹6 లక్షల లోపు ఉండాలి. ఆ మున్సిపల్ కార్పొరేషన్ పరిధిలో ఇల్లు లేని స్థానికులే అర్హులు. దరఖాస్తు ఫీజు ₹11 కాగా, డిపాజిట్ ₹10,000 చెల్లించాలి.

దరఖాస్తులను హౌసింగ్ బోర్డు రూపొందించిన 360 డిగ్రీల ప్రత్యేక యాప్ ద్వారా పరిశీలిస్తారు. మున్సిపాలిటీ, ట్రాన్స్‌కో తదితర శాఖల రికార్డుల ఆధారంగా వివరాలు నిర్ధారిస్తారు. ఆ కార్పొరేషన్ పరిధిలో ఇల్లు లేదా స్థలం ఉందా, దరఖాస్తుదారు స్థానికుడా అనే అంశాలను గుర్తిస్తారు. అనంతరం అర్హులను లాటరీ ద్వారా ఎంపిక చేస్తారు. ఎంపికైన వారి ఇళ్ల వద్దకు వెళ్లి క్షేత్రస్థాయి పరిశీలన చేస్తారు. అందులో అర్హులుగా తేలిన వారికి ఫ్లాట్ కేటాయింపు పత్రాలు ఇస్తారు.

చెల్లింపు విధానం నాలుగు దశల్లో ఉంటుంది. తొలి విడతలో ₹10,000 డిపాజిట్ తర్వాత మరో ₹90,000 చెల్లించాలి. RCC నిర్మాణం పూర్తయ్యాక ₹1 లక్ష చెల్లించాలి. నిర్మాణం పూర్తయ్యే దశలో మరో ₹1 లక్ష చెల్లించాలి. మిగిలిన సొమ్మును ఫ్లాట్ అప్పగించే సమయంలో చెల్లించాలి. డిసెంబర్ 9న ఇందిరమ్మ టవర్ల నిర్మాణానికి శంకుస్థాపన చేయనున్నారు. ఏడాదిలోగా నిర్మాణం పూర్తి చేయాలని ప్రభుత్వం భావిస్తోంది.