ఇండోనేషియాలో భారీ భూకంపం.. 47 మంది మృతి, పలువురు గాయపడ్డారు

ఇండోనేషియాలో శనివారం భారీ భూకంపం సంభవించింది. ఇప్పటివరకు 47 మంది మరణించినట్లు అధికారులు తెలిపారు. పలువురు గాయపడ్డారు.

అమెరికా జియోలాజికల్ సర్వే ప్రకారం, స్థానిక కాలమానం ప్రకారం తెల్లవారుజామున 5:58 గంటలకు ఈ భూకంపం వచ్చింది. తూర్పు నుసా టెంగారా ప్రావిన్స్‌లోని ఎండే నగరానికి వాయవ్యంగా 68 కిలోమీటర్ల దూరంలో కేంద్రం ఉంది. సముద్ర గర్భంలో 10 కిలోమీటర్ల లోతున భూకంపం సంభవించింది. దీని తీవ్రత 7.7గా నమోదైంది.

భూకంపం తర్వాత మధ్యాహ్నానికి 235 ప్రకంపనలు నమోదయ్యాయి. వాటిలో 6.2 తీవ్రతతో కూడిన ప్రకంపన ఒకటి ఉంది. తొలుత సునామీ హెచ్చరిక జారీ చేశారు. కానీ సముద్ర మట్టాల్లో పెద్ద మార్పులు లేకపోవడంతో సునామీ ముప్పు లేదని అధికారులు ప్రకటించారు. మంగారై, తూర్పు మంగారై ప్రాంతాల్లో అలలు ఎగిసిపడ్డాయి. మావురోల్, ఎండే ప్రాంతాల్లో సుమారు మూడు అడుగుల ఎత్తు అలలు వచ్చాయి.

సిక్కా, పశ్చిమ మంగారై, తూర్పు మంగారై ప్రాంతాల్లో భూకంప ప్రభావం ఎక్కువగా కనిపించింది. సహాయక బృందాలు ఈ ప్రాంతాల నుంచి దాదాపు 40 మృతదేహాలను వెలికి తీశాయి. మరో రెండు గ్రామాలను మట్టి దిబ్బలు కప్పేశాయి. శిథిలాల కింద చిక్కుకున్న వారి కోసం గాలింపు కొనసాగుతోంది.

ఆసుపత్రులు అప్రమత్తం అయ్యాయి. గాయపడిన వారి చికిత్స కోసం అదనపు బెడ్లు, ఆక్సిజన్ సిలిండర్లు, IV స్టాండ్లు సిద్ధం చేశారు. ఇండోనేషియా జాతీయ విపత్తు నిర్వహణ సంస్థ మూడు హెలికాప్టర్లు, ఒక సహాయక నౌకను రంగంలోకి దించింది. మృతుల సంఖ్య మరింత పెరిగే అవకాశం ఉందని అధికారులు అంచనా వేస్తున్నారు.