IPL 2026 ఫైనల్: RCB, GT మ్యాచ్‌లో గవాస్కర్ కీలక విశ్లేషణ

అహ్మదాబాద్ లోని నరేంద్ర మోదీ స్టేడియంలో IPL 2026 ఫైనల్ ముందు దిగ్గజ క్రికెటర్ సునీల్ గవాస్కర్ ఆసక్తికర విశ్లేషణ చేశారు. గుజరాత్ టైటాన్స్ సొంత మైదానంలో RCB అభిమానులు కూడా భారీగా ఉన్నారని, ఇరు జట్ల మద్దతుదార్లు 50-50 శాతంగా విడిపోయారని ఆయన తెలిపారు. విరాట్ కోహ్లీ ప్రాబల్యమే ఇందుకు కారణమని, RCB, CSK లకు దేశమంతటా అపారమైన ఫ్యాన్ ఫాలోయింగ్ ఉందని గవాస్కర్ అన్నారు.

లీగ్ దశలో వరుసగా మొదటి రెండు స్థానాల్లో నిలిచిన జట్లే టైటిల్ కోసం తలపడుతుండడంతో ఇదే అత్యుత్తమ ఫైనల్ అని ఆయన అభిప్రాయపడ్డారు. 'టాప్ రెండు జట్లు ఫైనల్ చేరడం అంటే అదే బెస్ట్ ఫైనల్; ఈ రెండు జట్లు మిగిలిన ఎనిమిదింటి కన్నా చాలా ముందున్నాయి' అని వివరించారు.

గుజరాత్ టైటాన్స్ జట్టు ఉరుములు, మెరుపుల కారణంగా అహ్మదాబాద్ చేరుకోవడం ఆలస్యమైంది. దీంతో 24 గంటల్లోనే మైదానంలోకి దిగుతుండటం ఆటగాళ్లపై ప్రభావం చూపుతుందని గవాస్కర్ హెచ్చరించారు. 'విమానం ఎప్పుడు బయలుదేరుతుందో తెలియని టెన్షన్, శారీరక విశ్రాంతి లేకపోవడం ఆటగాళ్లపై మానసిక ఒత్తిడి పెంచుతాయి. రిజర్వ్ డే ఉన్న నేపథ్యంలో ఫైనల్‌ను సోమవారానికి వాయిదా వేసినా బాగుండేది' అని ఆయన అభిప్రాయపడ్డారు. నిర్వాహకులు భవిష్యత్ సీజన్లలో ఇటువంటి పరిస్థితులను పరిగణలోకి తీసుకోవాల్సిన అవసరముందన్న సూచన కూడా చేశారు.

క్వాలిఫయర్-1 లో RCB భారీ తేడాతో GT ను ఓడించిన నేపథ్యంలో ఆ విజయం ఫైనల్‌లో RCB ఆత్మవిశ్వాసాన్ని రెట్టింపు చేస్తుందని గవాస్కర్ చెప్పారు. అయితే రెండు రోజుల క్రితం రాజస్థాన్ రాయల్స్‌పై GT ఘన విజయం సాధించడంతో వారికీ కాన్ఫిడెన్స్ కొరత లేదని జోడించారు. గత ఐదు రోజుల్లో డిఫెండింగ్ ఛాంపియన్స్‌గా RCB సాధించిన ఆధిక్యత ఫైనల్‌లో కీలక పాత్ర పోషిస్తుందని ఆయన విశ్లేషించారు.