IPL విలువ 20 బిలియన్ డాలర్లకు చేరి NFL తర్వాత ప్రపంచంలో రెండో అతిపెద్ద క్రీడా ఆస్తిగా నిలిచింది

IPL విలువ 20.6 బిలియన్ డాలర్లకు (సుమారు ₹1.72 లక్షల కోట్లు) చేరింది. ఇన్వెస్ట్మెంట్ బ్యాంక్ జూలియన్ హాన్ లోకీ చేసిన అధ్యయనం ప్రకారం, ఇది గత ఏడాదితో పోలిస్తే 11.4% వృద్ధి. దీంతో IPL నేరుగా అమెరికన్ ఫుట్బాల్ లీగ్ NFL తర్వాత ప్రపంచంలోనే రెండో అతిపెద్ద క్రీడా ఆస్తిగా నిలిచింది.

2008లో ప్రారంభమైన ఈ లీగ్‌లో తొలి జట్లను వ్యాపార దిగ్గజాలు, బాలీవుడ్ తారలు కొనుగోలు చేశారు. ఆ తర్వాత ప్రైవేట్ ఈక్విటీ సంస్థల ప్రవేశంతో విలువ మరింత పెరిగింది. 2021లో యూరోపియన్ PE సంస్థ CVC క్యాపిటల్ పార్టనర్స్ గుజరాత్ టైటాన్స్ జట్టును ప్రారంభించడంలో పెట్టుబడి పెట్టి, కొంత వాటాను భారీ లాభంతో విక్రయించింది.

ఈ ఏడాది మార్చిలో రాయల్ ఛాలెంజర్స్ బెంగళూరు (RCB) జట్టును ఆదిత్య బిర్లా గ్రూప్, టైమ్స్ ఆఫ్ ఇండియా గ్రూప్, బోల్ట్ వెంచర్స్, బ్లాక్‌స్టోన్‌తో కూడిన కన్సార్టియం 1.78 బిలియన్ డాలర్లకు కొనుగోలు చేసింది. అలాగే మే నెలలో ఉక్కు దిగ్గజం లక్ష్మీ మిట్టల్, వ్యాక్సిన్ టైకూన్ అదర్ పూనావాలాలు రాజస్థాన్ రాయల్స్ జట్టును 1.65 బిలియన్ డాలర్లకు కొనుగోలు చేస్తామని ప్రకటించారు. ఈ డీల్‌లో మాంచెస్టర్ యునైటెడ్ సహ యజమాని, NFL టంపా బే బక్కనీర్స్ యజమాని అవ్రామ్ గ్లేజర్‌ను వెనక్కి నెట్టారు.

సింగపూర్ సార్వభౌమ సంపద నిధి టెమాసెక్, ప్రైవేట్ ఈక్విటీ దిగ్గజం KKR కూడా IPL జట్టు కొనుగోలుపై ఆసక్తి చూపుతున్నాయి. సిటీగ్రూప్ విశ్లేషణ ప్రకారం, ప్రపంచంలో అత్యధిక జనాభా కలిగిన దేశంలో అత్యంత ప్రజాదరణ పొందిన క్రీడ అయిన క్రికెట్‌లో కేవలం 10 జట్లు మాత్రమే ఉండటంతో దీనికి అరుదైన విలువ (scarcity value) లభిస్తోంది. 40 కోట్ల నుంచి 90 కోట్ల మంది భారతీయులు క్రమం తప్పకుండా మ్యాచ్‌లు చూస్తారని జూలియన్ హాన్ లోకీ పేర్కొంది. బలమైన రెవెన్యూ విజిబిలిటీ, క్రమశిక్షణతో కూడిన వ్యయ నిర్మాణం కూడా ఈ లీగ్ ఆకర్షణకు కారణమని తెలిపింది.