గగన్యాన్ మిషన్‌లో కీలకమైన ప్రధాన పారాచూట్ పరీక్ష విజయవంతం

భారత అంతరిక్ష పరిశోధన సంస్థ ఇస్రో గగన్యాన్ మిషన్‌లో మరో కీలక పరీక్షను విజయవంతంగా నిర్వహించింది. వ్యోమగాములను సురక్షితంగా భూమికి చేర్చే ప్రధాన పారాచూట్ వ్యవస్థను మధ్యప్రదేశ్‌లోని షియోపూర్ వద్ద పరీక్షించారు.

ఈ పరీక్షలో భారత వైమానిక దళానికి చెందిన IL-76 రవాణా విమానం నుంచి 2.5 కిలోమీటర్ల ఎత్తు నుంచి ఒక డమ్మీ పేలోడ్‌ను జారవిడిచారు. ముందుగా ఎక్స్‌ట్రాక్టర్ పారాచూట్ తెరుచుకొని, ఆ తర్వాత డ్రాగ్ పారాచూట్ పేలోడ్‌ను స్థిరపరిచింది. చివరగా ప్రధాన పారాచూట్ విజయవంతంగా తెరుచుకొని పేలోడ్ వేగాన్ని సురక్షిత స్థాయికి తగ్గించింది.

గగన్యాన్ క్రూ మాడ్యూల్‌కు మొత్తం 10 పారాచూట్లు ఉండగా, అవి నాలుగు దశల్లో పనిచేస్తాయి. మొదట రెండు అపెక్స్ కవర్ సెపరేషన్ పారాచూట్లు రక్షణ కవర్‌ను తొలగిస్తాయి. ఆ తర్వాత రెండు డ్రాప్ పారాచూట్లు వేగం తగ్గించి స్థిరత్వం కలిగిస్తాయి. మూడు పైలట్ పారాచూట్లు మూడు ప్రధాన పారాచూట్లను బయటకు తీసుకురాగా, అవి క్రూ మాడ్యూల్‌ను సురక్షితంగా సముద్రంలో ల్యాండ్ అయ్యేలా చేస్తాయి.

అత్యంత కఠినమైన పరిస్థితుల్లో పారాచూట్ వ్యవస్థ పనితీరును అంచనా వేయడమే ఈ పరీక్ష లక్ష్యమని ఇస్రో తెలిపింది. ఈ ప్రయోగాన్ని ఇస్రో, డీఆర్డీవోకు చెందిన ఏరియల్ డెలివరీ రీసెర్చ్ అండ్ డెవలప్మెంట్ ఎస్టాబ్లిష్మెంట్, భారత వైమానిక దళం సంయుక్తంగా నిర్వహించాయి. గగన్యాన్ తొలి మానవ సహిత ప్రయోగానికి ముందు మరిన్ని పరీక్షలు నిర్వహించనున్నారు.