ఒమేగా హాస్పిటల్స్‌పై పన్ను ఎగవేత ఆరోపణలతో IT సోదాలు

ఒమేగా హాస్పిటల్స్‌పై ఆదాయపు పన్ను శాఖ (IT) అధికారులు దేశవ్యాప్తంగా సోదాలు చేపట్టారు. పన్ను ఎగవేత ఆరోపణల నేపథ్యంలో ఈ సోదాలు జరుగుతున్నట్లు సమాచారం.

హైదరాబాద్ ఇన్వెస్టిగేషన్ వింగ్ ఆధ్వర్యంలో ప్రత్యేక బృందాలు ఈ తనిఖీలు నిర్వహిస్తున్నాయి. బంజారా హిల్స్‌లోని ఒమేగా హాస్పిటల్స్ ప్రధాన కార్యాలయంలో ఆరు బృందాలు సోదాలు చేస్తున్నాయి. మరో రెండు బృందాలు ఇతర రెండు ఆస్పత్రుల కార్యాలయాల్లో తనిఖీలు చేపట్టాయి. మొత్తం ఎనిమిది బృందాలు ఉదయం 11 గంటల నుంచి సోదాలు జరుపుతున్నాయి.

ఒమేగా హాస్పిటల్స్ డైరెక్టర్ మోహనవంశి ఇంటి వద్ద, కార్యాలయంలోనూ IT అధికారులు సోదాలు చేస్తున్నారు. ఆయన కుమార్తె ఒమేగా హాస్పిటల్స్ CEOగా ఉన్నారు. ఆమె ఇంట్లో కూడా తనిఖీలు జరుగుతున్నాయి. ఆస్పత్రుల్లో కీలకమైన డాక్టర్ల ఇళ్లలోనూ అధికారులు సోదాలు చేపట్టారు.

హైదరాబాద్‌తో పాటు ఆంధ్రప్రదేశ్, మధ్యప్రదేశ్, ఛత్తీస్‌గఢ్, ఉత్తరాఖండ్ రాష్ట్రాల్లోని ఒమేగా బ్రాంచ్‌లపై కూడా సోదాలు జరుగుతున్నాయి. ఏకకాలంలో 20కి పైగా ప్రాంతాల్లో తనిఖీలు జరుగుతున్నట్లు తెలుస్తోంది.

డాక్యుమెంట్లు, హార్డ్ డిస్క్‌లు, ఆర్థిక లావాదేవీల రికార్డులను అధికారులు స్వాధీనం చేసుకున్నట్లు సమాచారం. ఆస్పత్రుల ఆదాయం ఎంత ఉంది, ఎంత పన్ను చెల్లించారు, ఎంత కాలంగా చెల్లింపులు జరగలేదు అనే అంశాలపై దృష్టి పెట్టారు. పన్ను ఎగవేతతో పాటు మనీ లాండరింగ్ కోణంలోనూ ఆరోపణలు వస్తున్నట్లు తెలుస్తోంది.

ఈ సోదాలపై ఒమేగా హాస్పిటల్స్ యాజమాన్యం నుంచి ఇంకా స్పందన రాలేదు. IT అధికారుల నుంచి అధికారిక సమాచారం కూడా లభించలేదు.