గ్రేటర్ నోయిడా PNB శాఖలో ₹35 కోట్ల ఫ్రాడ్ ఆరోపణలు; ఖాతాదారుల నిరసన

గ్రేటర్ నోయిడాలోని పంజాబ్ నేషనల్ బ్యాంక్ (PNB) శాఖలో దాదాపు ₹35 కోట్ల మేర ఫ్రాడ్ జరిగినట్టు ఆరోపణలు వచ్చాయి. ఖాతాదారుల ఫిక్స్‌డ్ డిపాజిట్లు, అకౌంట్లలోని డబ్బు మాయమైనట్టు ఫిర్యాదులు అందాయి.

ఖాతాదారులు ఎవరూ బ్యాంకుకు వెళ్లలేదు. విత్‌డ్రాయల్ ఫారం నింపలేదు. ఏ పేపర్‌పై సంతకాలు చేయలేదు. ట్రాన్సాక్షన్ మెసేజ్ కూడా రాలేదు. బ్యాంకుకు వెళ్లిన తర్వాతే తమ డబ్బు మాయమైన విషయం వారికి తెలిసింది.

విజేంద్ర సింగ్ అనే ఖాతాదారుడి ఖాతాలో గతంలో దాదాపు ₹87 నుంచి ₹88 లక్షలు ఉండేవి. ప్రస్తుతం అందులో సుమారు ₹1 లక్ష మాత్రమే ఉన్నట్టు తేలింది. మరో వ్యక్తి ఖాతా నుంచి ₹39 లక్షలు మాయమయ్యాయి. మరొక ఖాతాదారుడి ఖాతా నుంచి ₹9.5 లక్షలు కనిపించడం లేదు.

డబ్బు తిరిగి ఇవ్వాలని, దోషులపై చర్యలు తీసుకోవాలని డిమాండ్ చేస్తూ పలువురు ఖాతాదారులు బ్యాంకు ఎదుట నిరసన తెలిపారు. పరిస్థితిని అదుపులో ఉంచేందుకు పోలీసులు అక్కడ బందోబస్తు ఏర్పాటు చేశారు.

ఈ వ్యవహారంపై పోలీసులు FIR నమోదు చేశారు. ఇప్పటివరకు 18 మంది ఫిర్యాదు చేసినట్టు సమాచారం. బ్రాంచ్ మేనేజర్‌తో సహా ఐదుగురు ఉద్యోగులను బ్యాంక్ యాజమాన్యం సస్పెండ్ చేసింది. బ్యాంక్ అంతర్గత విచారణ చేపట్టింది. డబ్బు రాబట్టే ప్రయత్నం చేస్తామని బ్యాంక్ హామీ ఇచ్చింది.