గుంటూరులో వీధి కుక్కల దాడులు: నెలకు వేలమంది GGH కి వస్తున్నారు

గుంటూరు కార్పొరేషన్‌లో మేయర్ ఎన్నికల ప్రచారం ముమ్మరంగా సాగుతున్న వేళ వీధి కుక్కల దాడుల సమస్య మరింత తీవ్రంగా మారింది. నగరంలో కుక్కల సంఖ్య విపరీతంగా పెరిగిపోవడంతో చిన్నారులు, వృద్ధులు, ద్విచక్రవాహనదారులు తీవ్ర ఇబ్బందులు పడుతున్నారు.

మూడేళ్ల క్రితం పశుసంవర్ధక శాఖ నిర్వహించిన గణన ప్రకారం గుంటూరు కార్పొరేషన్‌లో 28,350 వీధి కుక్కలు, 4,650 పెంపుడు కుక్కలు కలిసి మొత్తం 33,000 కుక్కలు ఉన్నట్లు తేలింది. అయితే ప్రస్తుతం ఈ సంఖ్య 70,000 వరకు పెరిగినట్లు అంచనా వేస్తున్నారు. 76 డివిజన్లు కలిగిన కార్పొరేషన్‌లో ప్రతి డివిజన్‌కు దాదాపు వెయ్యి కుక్కలు ఉన్నట్లు లెక్కలు చెప్తున్నాయి.

గత నాలుగేళ్లలో సంతానోత్పత్తి నిరోధక శస్త్రచికిత్సల కేంద్రాలు (ABC సెంటర్స్) సరిగా నిర్వహించకపోవడం వల్లనే కుక్కల సంఖ్య ఒక్కసారిగా పెరిగిపోయిందని విమర్శలు వస్తున్నాయి. ఒక ఏజెన్సీకి అప్పగించిన ABC సెంటర్‌ను ఆ ఏజెన్సీ మూసివేసిన నేపథ్యంలో కూటమి ప్రభుత్వం అధికారంలోకి వచ్చిన తర్వాత పెమ్మసాని చంద్రశేఖర్ ఆధ్వర్యంలో తిరిగి ABC సెంటర్ ప్రారంభించారు.

GGH అధికారిక లెక్కల ప్రకారం 2025 డిసెంబర్‌లో 3,590 మంది కుక్క కాటు బారిన పడి రేబిస్ ఇంజెక్షన్ తీసుకున్నారు. 2026 జనవరిలో 3,516 మంది, ఫిబ్రవరిలో 2,983 మంది GGH కి వచ్చారు. వీరిలో పలువురు చిన్నారులు కూడా ఉన్నారు. గత ఏడాది ఒక చిన్నారి కుక్కల దాడిలో మరణించిన విషాదకర సంఘటన కూడా చోటుచేసుకుంది.

రెండు మూడు రోజుల క్రితం పాత గుంటూరులో కుక్కలు దాడి చేసి ఒకే కుటుంబానికి చెందిన ఇద్దరు చిన్నారులను గాయపరచడంతో సమస్య మరింత దృష్టికి వచ్చింది. ప్రతిపక్ష నేతలు ఆసుపత్రికి వెళ్లి పరామర్శించి కార్పొరేషన్ అధికారులు పట్టించుకోవడం లేదని ఆరోపించారు.

కార్పొరేషన్ అధికారులు మాత్రం కోర్టు తీర్పుల పరిధిలోనే పని చేయాల్సి వస్తోందని, జంతుప్రేమికులు కోర్టులను ఆశ్రయించడంతో కుక్కలను పట్టుకెళ్లి శస్త్రచికిత్సలు చేసి తిరిగి అదే డివిజన్‌లో వదలాల్సి వస్తోందని చెప్తున్నారు. ప్రస్తుతం ఉన్న ఒక్క ABC సెంటర్ సరిపోవడం లేదని, మరిన్ని సెంటర్లు ఏర్పాటు చేయాల్సిన అవసరం ఉందని నగరవాసులు డిమాండ్ చేస్తున్నారు. కొత్తగా ఏర్పడే పాలక మండలి ఈ సమస్య పట్ల స్పష్టమైన హామీలు ఇవ్వాల్సిన అవసరం ఉందని ప్రజలు కోరుతున్నారు.