డీప్‌ఫేక్, CSAM కంటెంట్‌పై కఠిన చర్యలు: AI కంటెంట్‌ను 3 గంటల్లో తొలగించాలని కేంద్రం ప్రతిపాదన

కేంద్ర ప్రభుత్వం సమాచార సాంకేతిక (IT) నిబంధనలను మార్చేందుకు పెద్దయెత్తున సవరణలు ప్రతిపాదించింది. AI ఆధారిత కంటెంట్, డీప్‌ఫేక్లు, చైల్డ్ సెక్సువల్ అబ్యూజ్డ్ మెటీరియల్ (CSAM) వంటి వాటిపై నియంత్రణ బిగించడం లక్ష్యంగా ఈ ముసాయిదా నిబంధనలు తయారయ్యాయి. ప్రతిపాదన ప్రకారం, చట్టవిరుద్ధమైన AI కంటెంట్‌ను తొలగించే గడువు 36 గంటల నుంచి కచ్చితంగా 3 గంటలకు తగ్గించాలని నిర్ణయించారు. అంతేకాక, AI ఆధారిత కంటెంట్‌ను తప్పనిసరిగా లేబుల్ చేయాలని, డీప్‌ఫేక్‌లపై చర్యలు కఠినతరం చేయాలని, ఫిర్యాదుల పరిష్కారాన్ని వేగవంతం చేయాలని కూడా సూచించారు.

ఈ సవరణల వెనుక ప్రధాని నరేంద్ర మోదీ Facebook పోస్టు కొద్దిసేపు తొలగించబడిన ఘటన, CSAM నియంత్రణ, ప్లాట్‌ఫారాల జవాబుదారీతనం వంటి అంశాలపై మెటాతో జరిగిన చర్చలు ఉన్నాయి. మెటాతో రెండో విడత సమావేశంలో కేంద్రం ఐదు ప్రధాన ఆందోళనలను లేవనెత్తింది: ప్లాట్‌ఫారం జవాబుదారీతనం, భారత చట్టాల పాటింపు, డీప్‌ఫేక్లు, CSAM, భారత వినియోగదారులపై సోషల్ మీడియా కంపెనీల బాధ్యతలు.

ఈ సమావేశంలో భారతదేశంలో కార్యకలాపాలు సాగించే టెక్నాలజీ ప్లాట్‌ఫారాలు అమెరికా చట్టాల ప్రకారం నడవలేమని, భారత సమాజ రక్షణ కోసం రూపొందించిన ఇక్కడి లీగల్ ఫ్రేమ్‌వర్క్‌ను పాటించాల్సిందేనని ప్రభుత్వం స్పష్టం చేసింది. ప్రతిపాదిత సవరణల ద్వారా డిజిటల్ ప్లాట్‌ఫారాలపై నిబంధనలను మరింత కఠినం చేయాలనే కేంద్ర సంకల్పం తెలుస్తోంది.