సోనియా గాంధీ బయోపిక్‌కు రంగం సిద్ధం: జగ్గారెడ్డి ప్రకటన

కాంగ్రెస్ అగ్రనేత సోనియా గాంధీ జీవిత కథ ఆధారంగా తెలుగులో సినిమా తెరకెక్కనుంది. ఈ చిత్రాన్ని తాము నిర్మిస్తామని TPCC వర్కింగ్ ప్రెసిడెంట్ జగ్గారెడ్డి ప్రకటించారు.

సోనియా గాంధీ రాసిన 'Billowing: A Journey of Love' పుస్తకం ఆధారంగా ఈ సినిమా తీయనున్నట్లు ఆయన తెలిపారు. సోనియా గాంధీ రాజకీయ ప్రస్థానం, వ్యక్తిగత జీవితంలో ఎదుర్కొన్న పరిణామాలు, దేశ రాజకీయాల్లో ఆమె పోషించిన పాత్రను ప్రేక్షకులకు పరిచయం చేయాలని భావిస్తున్నట్లు చెప్పారు.

సంగారెడ్డి నియోజకవర్గానికి చెందిన కాంగ్రెస్ నాయకులు, కార్యకర్తలే ఈ సినిమాకు నిర్మాతలుగా వ్యవహరిస్తారు. దీని కోసం 50 మందితో ప్రత్యేక కమిటీ ఏర్పాటు చేయనున్నట్లు జగ్గారెడ్డి వెల్లడించారు.

నిధుల కోసం ఎవరినీ ఆశ్రయించబోమని ఆయన అన్నారు. కార్యకర్తలమే డబ్బులు సమకూర్చుకుంటామని, ఆ తర్వాత మంచి దర్శకుడిని ఎంపిక చేసి ప్రణాళికలు సిద్ధం చేస్తామని తెలిపారు.

తొలుత తెలుగులో ఈ సినిమా తీయనున్నారు. తెలంగాణ, ఆంధ్రప్రదేశ్ రెండు రాష్ట్రాల ప్రేక్షకులకూ ఈ చిత్రం చేరువ కానుంది. సినిమా షూటింగ్‌కు సీఎం రేవంత్ రెడ్డి, TPCC అధ్యక్షుడు మహేష్ కుమార్ గౌడ్‌లతో క్లాప్ కొట్టించాలని యోచిస్తున్నట్లు జగ్గారెడ్డి చెప్పారు.