కాకినాడ: 3 ఏళ్ల జాహ్నవి 10 రోజులుగా ఆచూకీ లేదు; కొండచిలువ అనుమానం

కాకినాడ జిల్లా తుని రూరల్లో మూడేళ్ల జాహ్నవి అనే బాలిక 10 రోజుల క్రితం అదృశ్యమైంది. ఇప్పటివరకు ఎలాంటి క్లూ లభించలేదు.

పోలీసులు, NDRF, SDRF బృందాలు 200 మందికి పైగా సిబ్బందితో అడవిని జల్లెడ పడుతున్నారు. డ్రోన్లు, డాగ్ స్క్వాడ్ల సాయంతో రోజూ గాలింపు కొనసాగిస్తున్నారు. ఒక్క ఆచూకీ దొరక్కపోవడంతో కేసు మరింత మిస్టరీగా మారింది.

తుని రూరల్ సీఐ చెన్నకేశవరావు మాట్లాడుతూ, జాహ్నవిని పైథాన్ (కొండచిలువ) మింగి ఉండొచ్చనే అనుమానం వ్యక్తం చేశారు. ఒకవేళ అలా జరిగితే, దుస్తులతో సహా ఎలాంటి ఆనవాళ్లూ మిగలవని వివరించారు. మెటలర్జికల్ విభాగం సాయంతో అలాంటి అవశేషాలను గుర్తించే ప్రయత్నం జరుగుతోందన్నారు.

జిల్లా ఎస్పీ బిందు మాధవ్ కూడా క్రూర మృగాల బారిన పడిన కోణంలో దర్యాప్తు చేస్తున్నామని తెలిపారు. అటవీ శాఖ అధికారులను రంగంలోకి దించామన్నారు. కానీ ఆ ప్రాంతంలో గతంలో మనుషులపై క్రూర మృగాలు దాడి చేసిన దాఖలాలు లేవని అటవీ శాఖ స్పష్టం చేసింది.

చీకటి పడ్డాక కూడా థర్మాల్ డ్రోన్లతో గాలింపు కొనసాగుతోంది. వేడి ఆధారంగా మనుషులు, జంతువుల కదలికలను గుర్తించే ఈ డ్రోన్లు రాత్రంతా పని చేశాయి. రేడియేషన్ డిటెక్టర్ సాయంతో బాలికకు ఉన్న వెండి కాళ్లపట్టీలు, గొలుసు ద్వారా ఆచూకీ కనుగొనే ప్రయత్నం జరిగింది.

బాలిక అదృశ్యమైన 40 ఎకరాల పామాయిల్ తోట చుట్టూ కంచె ఉంది. చిన్నారి ఈ కంచెను దాటడం సాధ్యం కాదని పోలీసులు భావిస్తున్నారు. కంచె దగ్గర కుక్క వెంట్రుకలు, బాలిక జుట్టు కనిపించినట్లు స్థానికులు చెప్పారు.

కుటుంబ సభ్యులు ఒక జ్యోతిష్యుడిని సంప్రదించగా, బాలిక క్షేమంగా ఉందని, త్వరలోనే తిరిగి వస్తుందని ఆయన చెప్పినట్లు తెలిసింది. ఈ మాటలతో తల్లిదండ్రులు ఆశగా ఎదురుచూస్తున్నారు.