జపాన్‌లో 7.1 తీవ్రతతో భారీ భూకంపం; నాగసాకి సమీపంలో కేంద్రం

జపాన్‌లో గురువారం భారీ భూకంపం సంభవించింది. రిక్టర్ స్కేల్‌పై భూకంప తీవ్రత 7.1గా నమోదైంది. నాగసాకి నగరానికి 80 కిలోమీటర్ల దూరంలో ఈ భూకంప కేంద్రం కేంద్రీకృతమైనట్లు తెలిసింది.

భూకంపం తీవ్రత ఎక్కువగా ఉండడంతో జపాన్ వాతావరణ సంస్థ సునామి హెచ్చరిక జారీ చేసింది. ప్రజలు సముద్ర తీర ప్రాంతాలకు దూరంగా ఉండాలని, అవసరమైతే ఎత్తైన ప్రదేశాలకు తరలివెళ్లాలని అధికారులు సూచించారు.

భూకంపం ధాటికి ప్రభావిత ప్రాంతాల్లో విద్యుత్ సరఫరా నిలిచిపోయింది. ఆహార సరఫరా కూడా ఆగిపోయినట్లు స్థానిక నివేదికలు తెలుపుతున్నాయి. ప్రజలు భయంతో బయటకు రాకుండా ఇండోర్లలోనే ఉంటున్నారు. భూకంపం సమయంలో భవనాలు కంపించిన దృశ్యాలు సోషల్ మీడియాలో వైరల్ అవుతున్నాయి.

ఇప్పటివరకు ప్రాణనష్టం వివరాలు వెల్లడికాలేదు. సహాయ చర్యలు ప్రారంభమయ్యాయి. అధికార యంత్రాంగం పరిస్థితిని నిశితంగా పరిశీలిస్తోంది.