జయశంకర్ యూనివర్సిటీ వైస్ ఛాన్సలర్‌పై లైంగిక వేధింపుల ఆరోపణలు: కేసు నమోదు

ప్రొఫెసర్ జయశంకర్ యూనివర్సిటీ వైస్ ఛాన్సలర్‌పై లైంగిక వేధింపుల ఆరోపణలపై తెలంగాణ మహిళా కమిషన్ కేసు నమోదు చేసింది. ఈ విషయాన్ని బాధిత అసిస్టెంట్ ప్రొఫెసర్ మీడియాకు తెలిపారు. తనకు ఈమెయిల్ ద్వారా ఈ సమాచారం అందిందని ఆమె చెప్పారు.

ఫిర్యాదు ఇచ్చి 10 నుంచి 15 రోజులు గడిచినా ఎలాంటి చర్య తీసుకోలేదని ఆమె ఆరోపించారు. తనకు న్యాయం జరిగే వరకు పోరాటం ఆపేది లేదని స్పష్టం చేశారు. పక్షపాతం లేకుండా విచారణ జరిపి బాధ్యులపై చట్టపరమైన చర్యలు తీసుకోవాలని డిమాండ్ చేశారు.

ఫిర్యాదు వెనక్కి తీసుకోవాలని కొందరు ఫోన్ చేసి బెదిరిస్తున్నారని ఆమె ఆరోపించారు. కొందరు ఇంటికి వచ్చి భయభ్రాంతులకు గురి చేస్తున్నారని తెలిపారు. ఈ వ్యవహారం DGP స్థాయికి చేరిందని, మానవ హక్కుల సంఘం కూడా కేసు నమోదు చేసినట్లు సమాచారం ఉందని ఆమె పేర్కొన్నారు.

తనకు టీచింగ్, నాన్-టీచింగ్ సిబ్బంది, విద్యార్థులు మద్దతు ఇచ్చారని ఆమె తెలిపారు. బాధితురాలి భర్త కూడా పూర్తిస్థాయి విచారణ జరిపి న్యాయం చేయాలని కోరారు.

మహిళా కమిషన్ కేసు నమోదు మొదటి అడుగు మాత్రమే అని ఆమె అన్నారు. తర్వాత జరిగే విచారణ సమతూకంగా ఉండాలని, తనకు న్యాయం జరగాలని కోరారు.