CPS ఉద్యోగులకు పాత పెన్షన్‌కు మారే అవకాశం.. GO 158 జారీ

కాంట్రిబ్యూటరీ పెన్షన్ స్కీమ్ (CPS) పరిధిలో ఉన్న ఉద్యోగులు పాత పెన్షన్ విధానంలోకి మారేందుకు వీలు కల్పిస్తూ రాష్ట్ర ప్రభుత్వం GO 158 జారీ చేసింది. ఆర్థిక శాఖ ప్రిన్సిపల్ సెక్రటరీ పీయూష్ కుమార్ ఈ ఉత్తర్వులు జారీ చేశారు.

2004 సెప్టెంబర్ 1 కంటే ముందే నియామక నోటిఫికేషన్ లేదా రిక్రూట్‌మెంట్ అడ్వర్టైజ్‌మెంట్ జారీ అయి ఉండాలి. ఆ నోటిఫికేషన్ ద్వారా ఎంపికై 2004 సెప్టెంబర్ 1 లేదా ఆ తర్వాత విధుల్లో చేరిన వారు అర్హులు. ప్రస్తుతం CPS పరిధిలో ఉన్న ఉద్యోగులందరికీ ఈ ఉత్తర్వులు వర్తిస్తాయి.

ఇప్పటికే పదవీ విరమణ చేసిన ఉద్యోగులు కూడా దరఖాస్తు చేసుకోవచ్చు. ఉద్యోగి మృతి చెంది ఫ్యామిలీ పెన్షన్ పొందుతున్న కుటుంబాలకు కూడా ఈ అవకాశం ఉంటుంది. ఈ మార్పు ఒక్కసారి మాత్రమే ఇచ్చే అవకాశం అని ప్రభుత్వం స్పష్టం చేసింది.

అర్హులైన వారు ఈ ఏడాది డిసెంబర్ 31లోగా తమ ఆప్షన్ ఫారాలను అధికారికంగా సమర్పించాలి. మొత్తం 11,000 మంది ఉద్యోగులు ఈ పరిధిలోకి వస్తారని ప్రభుత్వ వర్గాలు తెలిపాయి.

కేంద్ర ప్రభుత్వ NPS నిబంధనలను ఆదర్శంగా తీసుకుని ఈ ఉత్తర్వులు జారీ అయ్యాయి. గత జూలై 13న విడుదల చేసిన GO 53 ఆధారంగా ఈ ప్రక్రియను పారదర్శకంగా పూర్తి చేయాలని ఆర్థిక శాఖ ఆదేశించింది. దరఖాస్తులను జాప్యం లేకుండా పరిశీలించాలని, గడువు ముగిసిన వెంటనే పెన్షన్ ప్రయోజనాలను ఖరారు చేయాలని శాఖాధిపతులు, ట్రెజరీ అధికారులకు సూచించింది. ఆదేశాలు ఉల్లంఘిస్తే చర్యలు ఉంటాయని హెచ్చరించింది.

ఈ నిర్ణయంపై ఉద్యోగ సంఘాలు సంతోషం వ్యక్తం చేస్తున్నాయి. తమ పోరాటానికి లభించిన పాక్షిక విజయంగా వారు అభివర్ణిస్తున్నాయి. గత ప్రభుత్వ హయాంలో ఈ అంశంపై పరిష్కారం లభించలేదని ఉద్యోగ సంఘాలు చెప్తున్నాయి.